കൂട്ടുകൂടി, പാട്ടുപാടി കുഞ്ഞിളം കൂട്ടുകാർ

ചിത്രം കൊല്ലം: കളിക്കൂട്ടുകാരുടെ കൈപിടിക്കേണ്ട കുരുന്നു​പ്രായം വീടിന്‍റെ ചുമരുകൾക്കുള്ളിൽ ചുരുങ്ങിപ്പോയതിന്‍റെ പരിഭവങ്ങൾ മറന്ന്​ കുരുന്നുകൾ ഒത്തുചേർന്നു. രണ്ടു​വർഷത്തെ ഇടവേളക്ക്​ ശേഷം കുഞ്ഞുമക്കളുടെ ചിരിയും വർത്തമാനവും പാട്ടുകളും കഥകളും നിറഞ്ഞ്​ അംഗൻവാടി കെട്ടിടങ്ങൾക്ക്​ 'ജീവൻവെച്ചു'. തിങ്കളാഴ്ച തുറന്ന ജില്ലയിലെ 2723 അംഗൻവാടികളിലേക്കും പ്രാഥമിക വിദ്യാഭ്യാസത്തിന്‍റെ സാമൂഹിക ഇടപെടലിന്‍റെയും ആദ്യപാഠങ്ങൾ നുകരാൻ ഏറെ ഉത്സാഹത്തോടെയാണ്​ കുരുന്നുകൾ എത്തിയത്​. രക്ഷാകർത്താക്കളുടെയും കുട്ടികളുടെയും ഭാഗത്ത്​ നിന്ന്​ മികച്ച​ പ്രതികരണം ഉണ്ടായപ്പോൾ ഓരോ അംഗൻവാടിയിലും 50-60 ശതമാനത്തോളം കുട്ടികളാണ്​ ആദ്യദിനം എത്തിയത്​. കുട്ടികൾ എത്തിയിരുന്നില്ലെങ്കിലും കഴിഞ്ഞ രണ്ട്​ വർഷവും അംഗൻവാടികളിൽ അധ്യാപികമാരും സഹായികളും എത്തിയിരുന്നു. പോഷകാഹാരങ്ങൾ കൃത്യമായി കുട്ടികൾക്ക്​ എത്തിക്കുന്നതും മറ്റ്​ പ്രവർത്തനങ്ങളുമാണ്​ ഇവർ ചെയ്തിരുന്നത്​. മിക്ക അധ്യാപകരും ഓൺലൈൻ ആയി ക്ലാസെടുത്തു. തുറക്കുന്നതിന്​ മുന്നോടിയായി അംഗൻവാടിയും പരിസരവും ശുചീകരിക്കുകയും അലങ്കരിക്കുകയും ചെയ്തിരുന്നു. വാട്​സ്​ആപ്​ ഗ്രൂപ്പുകളിലൂടെ രക്ഷാകർത്താക്കൾക്ക്​ ആവശ്യമായ നിർദേശങ്ങളും നൽകി. ആദ്യദിനം സമ്മാനങ്ങളും മധുരവും നൽകി ആഘോഷപൂർവം​ അംഗൻവാടി പ്രവർത്തകർ സ്വീകരിച്ചത്​ കുട്ടികൾക്ക്​ ആഹ്ലാദാനുഭവമായി. സാമൂഹിക അകലം പാലിച്ച്​ ഇരിപ്പിടങ്ങളും കൈകൾ സാനിറ്റൈസ്​ ചെയ്യാനുള്ള സംവിധാനവുമെല്ലാം ഒരുക്കിയിരുന്നു. പ്രാദേശിക സ്ഥിതി അനുസരിച്ച്​ ക്ലാസ്​ സമയം ക്രമീകരിക്കാൻ ആണ്​ നിർദേശം നൽകിയിരുന്നത്​. ഉച്ചവരെ നീണ്ട ക്ലാസിൽ പാട്ടും കഥകളും സൗഹൃദവും നിറഞ്ഞ പുത്തൻ അന്തരീക്ഷം ആസ്വദിച്ച കുരുന്നുകൾ വീണ്ടും കാണാം എന്ന ഉറപ്പും നൽകിയാണ്​ വീടുകളിലേക്ക്​ മടങ്ങിയത്​. മികച്ച പ്രതികരണം മികച്ച പ്രതികരണമാണ്​ ജില്ലയിലുടനീളം അംഗൻവാടികളിൽ കാണാനായത്​. കുട്ടികളും രക്ഷാകർത്താക്കളും ആവേശത്തോടെ​ ആദ്യ ദിനം എത്തി. കോവിഡ്​ മാനദണ്ഡം പാലിച്ചുള്ള ക്രമീകരണങ്ങളും ശുചീകരണവും നേര​േത്ത പൂർത്തിയാക്കിയിരുന്നു. നിർദേശങ്ങൾ പൂർണമായും പാലിച്ചുള്ള പ്രവർത്തനമാണ്​ ആദ്യദിവസം അംഗൻവാടികളിൽ കാണാനായത്. -ടിജു റെയ്​ച്ചൽ, ജില്ല പ്രോഗ്രാം ഓഫിസർ ഐ.സി.ഡി.എസ്​