ഓടിക്കൊണ്ടിരുന്ന പിക്​ അപ്​​ വാൻ കത്തിനശിച്ചു

കൊല്ലം: ഓടിക്കൊണ്ടിരിക്കെ തീ പിടിച്ച പിക്​ അപ്​​ വാൻ കത്തിനശിച്ചു. തീയുയരുന്നത്​ കണ്ട്​ പെട്ടെന്ന്​ പുറത്തിറങ്ങിയ വാഹന ഉടമയും ഡ്രൈവറും തലനാരിഴക്ക്​ രക്ഷപ്പെട്ടു. സമീപത്തെ ചാമക്കട അഗ്​നിരക്ഷാസേന സ്ഥലത്തെത്തി തീ കെടുത്തിയപ്പോഴേക്കും വണ്ടിയുടെ ഡാഷ്​ബോർഡിൽ സൂക്ഷിച്ചിരുന്ന 25,000 രൂപയും തമിഴ്നാട് പെർമിറ്റ്, ലൈസൻസ്, ആധാർ കാർഡ്, തിരിച്ചറിയൽ രേഖകൾ അടക്കം അഗ്​നിക്കിരയായി. തിങ്കളാഴ്ച പുലർച്ച 5.30ന്​ പള്ളിത്തോട്ടത്താണ്​ സംഭവം. പൊള്ളാച്ചിയിലേക്കുള്ള യാത്രക്കിടെ ഗൂഗ്​ൾ മാപ്പിൽ കണ്ട വഴിയിലൂടെ പള്ളിത്തോട്ടത്ത്​ എത്തിപ്പെട്ടതായിരുന്നു വാഹനം. ഉടമയായ തിരുവനന്തപുരം വർക്കല സ്വദേശി ലിജിനും ഡ്രൈവർ കാർത്തിക്കുമാണ്​ വാഹനത്തിലുണ്ടായിരുന്നത്​. പൊള്ളാച്ചിയിൽനിന്ന്​ പച്ചക്കറിയും കുടംപുളിയും വാങ്ങി തിരുവനന്തപുരം വെമ്പായത്ത്​ കച്ചവടം നടത്തുകയാണ്​ ലിജിൻ. ലോഡ്​ എടുക്കാൻ വെമ്പായം വഴിയാണ്​ സ്ഥിരം പോയിരുന്നത്​. ഇത്തവണ വർക്കലയിലെ വീട്ടിൽനിന്ന്​ പുറപ്പെട്ടതിനാൽ യാത്ര കൊല്ലം വഴി ആക്കുകയായിരുന്നു. എസ്​.എൻ കോളജ്​ ജങ്​ഷനിൽ എത്തിയപ്പോൾ ഗൂഗ്​ൾ മാപ്പിൽ ഓവർ ബ്രിഡ്​ജിലൂടെ കാണിച്ച വഴികയറിയാണ്​ പള്ളിത്തോട്ടത്ത്​ എത്തിയത്​. പള്ളിത്തോട്ടം റോഡിൽവെച്ച്​ മുൻവശത്ത്​ തീയുയരുന്നത്​ കണ്ടപ്പോൾതന്നെ ഇരുവരും പുറത്തുചാടി. തീപടരുന്നത്​ കണ്ട്​ സ്ഥലത്തുണ്ടായിരുന്ന സ്ത്രീ അഗ്​നിരക്ഷാനിലയം അടുത്താണെന്ന്​ വിവരം നൽകി. ഒരു ഇരുചക്രയാത്രികന്‍റെ സഹായത്തോടെ കാർത്തിക്​ ചാമക്കടയിലെത്തി വിവരമറിയിച്ചു. വിവരമറിഞ്ഞ്​ എത്തിയ രണ്ട്​ യൂനിറ്റ്​ അഗ്​നിരക്ഷാസേന സ്​റ്റേഷൻ ഓഫിസർ ബി. സുരേഷ്​ കുമാറിന്‍റെ നേതൃത്വത്തിൽ എത്തിയാണ്​ തീയണച്ചത്​. അപ്പോഴേക്കും മുൻവശവും കാബിനും പൂർണമായും നശിച്ചു.