ആശുപത്രി വളപ്പിൽ തീപിടിത്തം

പരവൂര്‍: നെടുങ്ങോലം താലൂക്ക് ആശുപത്രിക്കു പിന്നിലെ പറമ്പിൽ കാടിന്​ തീപിടിച്ചു. വൈകീട്ട്​ മൂന്നരയോടെയായിരുന്നു സംഭവം. ആശുപത്രിക്കുപിന്നിലെ നാല് ഏക്കറോളമുള്ള ഭാഗത്ത് നിമിഷ നേരം കൊണ്ട് തീപടരുകയായിരുന്നു. കാട് വെട്ടിത്തെളിക്കണമെന്നാവശ്യപ്പെട്ട് പരവൂര്‍ അഗ്​നിരക്ഷാ സേന ഒരു മാസം മുമ്പ്​ ആശുപത്രി അധികൃതര്‍ക്ക് കത്ത് നല്‍കിയെങ്കിലും നടപടിയുണ്ടായില്ല. കാടിനുള്ളില്‍ കിടന്ന പാഴ്‌വസ്തുക്കള്‍ക്കും തീപിടിച്ചു. സ്റ്റേഷന്‍ ഓഫിസര്‍ ഡി. ഉല്ലാസിന്‍റെ നേതൃത്വത്തില്‍ പരവൂര്‍ അഗ്​നിരക്ഷാ നിലയത്തില്‍ നിന്ന്​ രണ്ട് യൂനിറ്റുകളെത്തിയാണ് തീകെടുത്തിയത്. സീനിയർ ഓഫിസർ ബി. ശ്രീകുമാർ, ഇ. ഡൊമിനിക്, ഫയർ ഓഫിസർമാരായ എസ്. സുജിത്ത്, സി. ഷാജി, എസ്.എം. ആദർശ്, ടി.എസ്. ശ്യാം കുമാർ, എം.കെ. അനു, ഹോംഗാർഡുമാരായ കെ. തങ്കച്ചൻ, എൽ. ഷാജി എന്നിവർ ചേര്‍ന്നാണ് തീകെടുത്തിയത്.