നോക്കുകുത്തിയായി ട്രാഫിക് സിഗ്​നൽ ലൈറ്റ്

ഇരവിപുരം: ദേശീയപാതയിൽ കൊല്ലൂർവിള പള്ളിമുക്കിലെ ട്രാഫിക് സിഗ്‌നൽ ലൈറ്റ് നോക്കുകുത്തിയായിട്ട് വർഷങ്ങൾ കഴിഞ്ഞ​ു. 2012-13ൽ എം.എൽ.എ ഫണ്ടിൽ നിന്ന്​ പതിനാലു ലക്ഷത്തോളം രൂപ മുടക്കി നിർമിച്ച സിഗ്നൽ ലൈറ്റാണ് നശിക്കുന്നത്. ജങ്​ഷ​ൻെറ കിഴക്കുവശം ഇരവിപുരം റോഡ് ആരംഭിക്കുന്ന ഭാഗത്തും അയത്തിൽ റോഡ് ആരംഭിക്കുന്ന ഭാഗത്തും സിഗ്​നൽ ലൈറ്റ് സ്ഥാപിച്ചിട്ടുണ്ട്. കുറച്ചുനാൾ സിഗ്​നൽ പ്രവർത്തിച്ചെങ്കിലും സമയ ക്രമീകരണത്തിലെ അപാകത മൂലം ലൈറ്റ് ഓഫാക്കുകയായിരുന്നു. ഈ ലൈറ്റ് നിലവിലുണ്ടായിരുന്നപ്പോൾ പ്രായമായവർക്ക് റോഡ് മുറിച്ചുകടക്കുന്നതിന് ഏറെ പ്രയോജനപ്രദമായിരുന്നു. സോളാർ പാനലിൽ പ്രവർത്തിച്ചിരുന്ന സിഗ്​നൽ ലൈറ്റി​ൻെറ ഒരു ഭാഗം ഇരവിപുരം റോഡിൽ തകർന്നു കിടക്കുകയാണ്. സിഗ്​നൽ ലൈറ്റ് പ്രവർത്തനക്ഷമമാക്കണമെന്ന ആവശ്യവുമായി മുതിർന്ന പൗരന്മാർ ജില്ല ഭരണകൂടത്തിന് പരാതി നൽകി കാത്തിരിക്കുകയാണ്. ഇരവിപുരം റോഡിന് അടുത്തുനിന്ന സിഗ്​നൽ ലൈറ്റിൽ ഒരെണ്ണം ഇളക്കിയ നിലയിലാണ്. ഗതാഗത നിയന്ത്രണത്തിന് പൊലീസോ ട്രാഫിക് വാർഡൻമാരോ ഇല്ലാത്ത ഇവിടെ ട്രാഫിക് സിഗ്​നൽ ലൈറ്റ് പ്രവർത്തനക്ഷമമാക്കാൻ പൊലീസി​ൻെറയും ജനപ്രതിനിധികളുടെയും ഭാഗത്തുനിന്ന്​ അടിയന്തര നടപടികൾ ഉണ്ടാകണമെന്നാണ്​ ആവശ്യം.