മാലിന്യം തള്ളുന്നവ​രെ കുടുക്കാന്‍ നിരീക്ഷണ കാമറയുമായി നാട്ടുകാര്‍

കുളത്തൂപ്പുഴ: ജനവാസമേഖലയിലും വനാതിര്‍ത്തിയിലെ പാതയോരത്തും മാലിന്യം തള്ളുന്നവരെ കണ്ടെത്താന്‍ നിരീക്ഷണ കാമറയുമായി നാട്ടുകാര്‍ രംഗത്ത്. പാതയോരത്ത്​ മാലിന്യം നിറഞ്ഞ്​ ദുര്‍ഗന്ധം നിമിത്തം നടക്കാനാകാതെ വന്നതോടെയാണ് പ്രതിരോധവുമായി നാട്ടുകാര്‍ രംഗത്തുവന്നത്. ഒരുവശം വനമേഖലയായ കുളത്തൂപ്പുഴ പച്ചയില്‍ക്കട-സാംനഗര്‍ പാതയിലുടനീളം രാത്രിയുടെ മറവില്‍ വന്‍തോതിൽ അറവുശാല മാലിന്യമടക്കം നിക്ഷേപിക്കുന്നുണ്ട്​. വാർഡ്​ ജാഗ്രതാ സമിതിയുടെ നേതൃത്വത്തിലാണ്​ പാതയോരത്ത് നിരീക്ഷണ കാമറകള്‍ സ്ഥാപിക്കാന്‍ തീരുമാനിച്ചത്​. പ്രദേശവാസികളാണ്​ ഇതിന്​ സഹായം നൽകിയത്​. പാതയുടെ ഇരുവശത്തെയും കാടുനീക്കി മാലിന്യം കുഴിയെടുത്ത് സംസ്കരിച്ചു. പഞ്ചായത്തംഗം സിസിലി ജോബ്, ജാഗ്രതാസമിതി അംഗങ്ങളായ കെ.കെ. കുര്യന്‍, മനാഫ്, സിന്ദു, ഹേമലത തുടങ്ങിയവര്‍ ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കി.