തുടർച്ചയായ മഴ: ശാസ്താംകോട്ട തടാകത്തിൽ ജലനിരപ്പ് ഉയരുന്നു

(ചിത്രം) ശാസ്താംകോട്ട: കനത്ത മഴ വലിയ നാശങ്ങൾ വിതക്കുമ്പോഴും ശാസ്താംകോട്ട തടാകത്തിന് അനുഗ്രഹമാകുന്നു. തുടർച്ചയായ മഴ മൂലം തടാകത്തിലെ ജലനിരപ്പ് ഉയരുകയാണ്. 10 വർഷം മുമ്പ് ആശങ്കാജനകമായി താഴ്ന്ന ജലനിരപ്പ് ഇപ്പോൾ ഏറെ ഉയർന്നു. കഴിഞ്ഞവർഷം ഇതേ കാലയളവിൽ 25 സെ.മീ. ഉയർച്ചയാണ് ഉണ്ടായതെങ്കിൽ ഈ വർഷം ജലനിരപ്പ്​ 106 സെ.മീ. ആണ് ഉയർന്നത്. ഒരു മീറ്റർ കൂടി ജലനിരപ്പ് ഉയർന്നാൽ കൽപ്പടവുകൾ വരെ എത്തും. തടാകത്തിൽ നിന്നുള്ള അമിതമായ ജലചൂഷണം കുറഞ്ഞതും പടിഞ്ഞാറേ കല്ലടയിലെയും സമീപ പ്രദേശങ്ങളിലെയും മണലൂറ്റ് നിലച്ചതും ജലനിരപ്പ് ഉയരാൻ കാരണമായി. എന്നാൽ തടാകസംരക്ഷണത്തിന് കേന്ദ്ര-സംസ്ഥാന സർക്കാറുകളും തദ്ദേശസ്ഥാപനങ്ങളും പ്രഖ്യാപിച്ച പദ്ധതികൾ ഇപ്പോഴും കടലാസിൽ ഉറങ്ങുകയാണ്.