എം.ഡി.എം.എയുമായി യുവാവ്​ അറസ്റ്റിൽ

ഇരവിപുരം: മാരക ലഹരിമരുന്നായ എം.ഡി.എം.എയുമായി യുവാവ്​ പിടിയിൽ. മുണ്ടയ്ക്കൽ തെക്കേവിള ഫ്ലാറ്റ് 41/628ൽ വാടകക്ക്​ താമസിക്കുന്ന തട്ടാമല തേജസ്​ നഗറിൽ ഉമർ മുക്താർ (21) ആണ് പിടിയിലായത്. ശനിയാഴ്ച രാവിലെ 11.45ഓടെ മുണ്ടയ്ക്കൽ വില്ലേജ് ഓഫിസിന് സമീപം സംശായാസ്​പദമായി കണ്ട യുവാവിനെ പരിശോധിച്ചതിൽ ഇയാളുടെ അടിവസ്​ത്രത്തിൽ ഒളിപ്പിച്ച നിലയിൽ 18 ചെറിയ പോളിത്തീൻ കവറുകളിലായി സൂക്ഷിച്ചിരുന്ന 6.79 ഗ്രാം തൂക്കം വരുന്ന എം.ഡി.എം.എ കണ്ടെത്തുകയായിരുന്നു. നഗരത്തിലെ യുവതീയുവാക്കൾക്ക് വിതരണത്തിനായി എത്തിച്ചതാണെന്ന്​ പ്രതി മൊഴി നൽകിയതായി പൊലീസ്​ അറിയിച്ചു. സിറ്റി പൊലീസ്​ മേധാവി മെറിൻ ജോസഫിന്‍റെ നിർദേശാനുസരണം ലഹരിമരുന്ന് വ്യാപാരത്തിനെതിരെ നടത്തിവരുന്ന ശക്തമായ നടപടിയുടെ ഭാഗമായാണ് അറസ്റ്റ്​. രണ്ട്​ ദിവസങ്ങളിലായി മൂന്ന്​ കേസുകളിലായി ഏഴ്​ ​യുവാക്കളെയാണ്​ സിറ്റി പരിധിയിൽ എം.ഡി.എം.എയുമായി പിടികൂടിയത്​. എ.സി.പി എ. അഭിലാഷിന്‍റെ നേതൃത്വത്തിൽ ഇരവിപുരം ഇൻസ്​പെക്ടർ അജിത് കുമാർ, എസ്​.ഐമാരായ ആർ. ജയകുമാർ, രാജേഷ്, അരുൺഷാ, ജയേഷ്, എ.എസ്​.ഐ സിദ്ദിക്ക്, ഡാൻസാഫ് അംഗങ്ങളായ എ.എസ്​.ഐ ബൈജൂ ജെറോം, എസ്​.സി.പി.ഒമാരായ സജു, മനു, സീനു, രിപു, രതീഷ്, സി.പി.ഒമാരായ പ്രേംകുമാർ, ലിനു ലാലൻ എന്നിവരടങ്ങിയ സംഘമാണ് ഉമർ മുക്താറിനെ പിടികൂടിയത്.