കൊറിയറിൽ പറന്നെത്തി എം.ഡി.എം.എ; രണ്ടുപേർ പിടിയിൽ

കൊല്ലം: ബംഗളൂരുവിൽ നിന്ന്​ ​കൊല്ലത്തേക്ക്​ കൊറിയർ വഴി അയച്ച മാരകമയക്കുമരുന്നായ എം.ഡി.എം.എയും അത്​ ഏറ്റുവാങ്ങാൻ വന്ന രണ്ട്​ യുവാക്കളും എക്​സൈസ്​ പിടിയിൽ. 15​ ഗ്രാം എം.ഡി.എം.എയാണ്​ കൊറിയർ വഴി കടത്തിയത്​. കൊല്ലം ആശ്രാമത്തുള്ള കൊറിയർ സ്ഥാപനത്തിൽ ജീവനക്കാർക്ക് പാർസൽ കണ്ട്​ ​സംശയം തോന്നിയതോടെ കൊല്ലം ഡെപ്യൂട്ടി എക്‌സൈസ് കമീഷണർ ബി. സുരേഷിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ എക്സൈസ് സ്‌ക്വാഡ് നടത്തിയ പരിശോധനയിലാണ് മയക്കുമരുന്ന്​ കണ്ടെത്തിയത്​. പാർസൽ കൈപ്പറ്റാൻ ബുക്ക്‌ ചെയ്ത ആളെ കാത്ത് മൂന്നുമണിക്കൂറോളം കൊറിയർ ഓഫിസിന്റെ പരിസരത്ത് കസ്റ്റമർ എന്ന രീതിയിൽ തമ്പടിച്ച എക്​സൈസ്​ ഉദ്യോഗസ്ഥർ, ചവറ പന്മന സ്വദേശി കോട്ടക്കകത്ത് വീട്ടിൽ നന്ദു കൃഷ്ണയെ(22) ആദ്യം പിടികൂടി. ചോദ്യം ചെയ്യലിൽ കൊറിയറിന്‍റെ യഥാർഥ ഉടമ കൊല്ലം ഉളിയകോവിൽ സ്വദേശി കൊതയത് നഗർ 114ൽ സൗപർണിക വീട്ടിൽ അനന്ത വിഷ്ണു(31) ആ​ണെന്ന്​ വ്യക്തമായി. കൊറിയർ വാങ്ങാൻ ശക്തികുളങ്ങര മരിയാലയം ജങ്​ഷനിൽ ഉള്ള പെട്രോൾ പമ്പിന് സമീപം നിന്ന ഇയാളെ എക്സൈസ്​ സംഘം തുടർന്ന്​ പിടികൂടി. ഇവരിൽ നിന്ന്​ രണ്ട് മൊബൈൽ ഫോണുകളും പിടികൂടിയിട്ടുണ്ട്. കേസിൽ പ്രതികളുടെ സാമ്പത്തിക ഇടപാടുകൾ അടക്കം അന്വേഷണം നടത്തുമെന്ന്​ കൊല്ലം ഡെപ്യൂട്ടി എക്‌സൈസ് കമീഷണർ ബി. സുരേഷ് അറിയിച്ചു. പിടികൂടിയ മൊബൈൽ ഫോണുകൾ കേന്ദ്രീകരിച്ചും അന്യസംസ്ഥാന ബന്ധങ്ങളെക്കുറിച്ചും വിപുലമായ അന്വേഷണം നടത്തുമെന്നും അസിസ്റ്റന്റ് എക്‌സൈസ് കമീഷണർ വി. റോബർട്ട്‌ അറിയിച്ചു.