വിസ തട്ടിപ്പിനിരയായ യുവാവിന്‍റെ കുടുംബത്തിന് ധനസഹായം

ചവറ: വ്യാജ വിസയിൽ ദുബൈയിലെത്തി ദുരിത ജീവിതത്തിൽ കഴിഞ്ഞ തേവലക്കര സ്വദേശി നിസാറിന്‍റെ കുടുംബത്തിന് കെ.എം.സി.സിയും ശിഹാബ് തങ്ങൾ സെന്‍റർ ഫോർ ഹ്യൂമൻ കെയറും സഹായധനം നൽകി. ഭക്ഷണവും താമസ സ്ഥലവുമില്ലാതെ ദുരിത ജീവിതം നയിക്കുന്ന നിസാറിനെ ദുബൈ കെ.എം.സി.സി ജില്ല പ്രസിഡന്‍റ് ഷഹീർ എം. പത്തനാപുരം, തേവലക്കര ബാദുഷ, യു.എ.ഇ പ്രവാസികളായ നാട്ടുകാർ എന്നിവരുടെ ശ്രമഫലമായി സംരക്ഷിക്കുകയായിരുന്നു. സെന്‍റർ ചെയർമാൻ കെ. യൂസുഫ് സലീമിൽനിന്ന് കുടുംബത്തിനുവേണ്ടി മുസ്​ലിം ലീഗ് തേവലക്കര പഞ്ചായത്ത് കമ്മിറ്റി പ്രസിഡന്‍റ് ഷിഹാബ് ധനസഹായം ഏറ്റുവാങ്ങി. നിസാർ കന്നേൽ, ഗുൽസാർ പന്മന, ശരീഫ് കണ്ണാപ്പള്ളിൽ, മജീദ്, നുജുമുദീൻ എന്നിവർ പങ്കെടുത്തു.