റോഡ് നിർമാണത്തിലെ അപാകത: വിജിലൻസ് പരിശോധന​ നടത്തി

പുനലൂർ: പുനലൂർ-പാപ്പന്നൂർ-ഇടമൺ റോഡ്, കഴുതുരുട്ടി-പൂത്തോട്ടം റോഡുകളിലെ നവീകരണത്തിലെ അപാകത കണ്ടെത്താൻ വിജിലൻസ് പരിശോധന നടത്തി. റോഡിലെ തകർന്ന ഭാഗം കുഴിച്ച് വിദഗ്ധ പരിശോധനക്കായി ടാറിന്‍റെ അടക്കം സാമ്പ്​ൾ ശേഖരിച്ചു. സംസ്ഥാന വ്യാപകമായി നടന്ന ഓപറേഷൻ 'സരൾ രാസ്ത'യുടെ ഭാഗമായിരുന്നു പുനലൂരിലേയും പരിശോധന. സാമ്പ്​ൾ ലാബ് പരിശോധനക്ക് ശേഷമേ അപാകത കണ്ടെത്താൻ കഴിയു. പുനലൂർ-പാപ്പന്നൂർ റോഡ് ദേശീയപാതയിൽ സന്ധിക്കുന്ന പുനലൂർ ടി.ബി ജങ്ഷനിൽ അടക്കം ടാർ ഇളകി കുഴികൾ രൂപപ്പെട്ടിരുന്നു. ടി.ബി. ജങ്ഷനിലാണ് കുഴിയെടുത്ത് സാമ്പ്​ൾ ശേഖരിച്ചത്. എട്ടര കോടി രൂപ അടങ്കലിൽ ഒരു വർഷം മുമ്പാണ് 10 കിലോമീറ്ററോളമുള്ള ഈ റോഡ് നവീകരിച്ചത്. താമസിയാതെ റോഡ് പലയിടത്തും തകർന്നിരുന്നു. വിജിലൻസ് ഇൻസ്പെക്ടർ ടി. ബിജു എസ്.ഐ സുനിൽകുമാർ എ.എസ്.ഐ സജി, എസ്.സി.പി.ഒ ദേവപാൽ അജീഷ്, നവാസ്, അൻസാരി, കബീർ എന്നിവരുടെ നേതൃത്വത്തിലായിരുന്നു പരിശോധന. കൂടാതെ പൊതുമരാമത്ത്, ദേശീയപാത അധികൃതരും പ​ങ്കെടുത്തു.