കോലിഞ്ചിമല പാറഖനനം: വിളക്കുടി പഞ്ചായത്ത് സെക്രട്ടറിക്കെതിരെ പരാതി നല്‍കി

കുന്നിക്കോട്: കോലിഞ്ചിമലയിലെ പാറഖനനം സംരക്ഷണസമരസമിതി വിളക്കുടി പഞ്ചായത്ത് സെക്രട്ടറിക്കെതിരെ വിജിലന്‍സില്‍ പരാതി നല്‍കി. ഖനനപ്രവര്‍ത്തനങ്ങള്‍ നിര്‍ത്തി​െവക്കണമെന്ന് ഹൈകോടതി വിധി ഉണ്ടായിട്ടും അത് സെക്രട്ടറി നടപ്പാക്കുന്നില്ലെന്ന് ചൂണ്ടിക്കാട്ടിയാണ് പരാതി. ലൈസന്‍സോ അനുമതിയോ ഇല്ല. നിലവില്‍ ഇവിടെ ഖനനപ്രവര്‍ത്തനങ്ങള്‍ നടക്കുന്നുണ്ടെന്നും സമരസമിതി ആരോപിക്കുന്നു. അനധികൃതമായ പാറഖനനവും മണ്ണെടുപ്പും നടക്കുന്ന കോലിഞ്ചിമലയ്​ക്ക് ചുറ്റും ഇരുനൂറോളം കുടുംബങ്ങളാണ് താമസിക്കുന്നത്. ഖനനത്തിനെതിരെ വിളക്കുടി ഗ്രാമപഞ്ചായത്ത് ഭരണസമിതി പ്രമേയം പാസാക്കിയിട്ടുണ്ട്. ഈ വസ്തുതകളെല്ലാം നിലനിൽക്കെ പ്രവര്‍ത്തനങ്ങള്‍ പഞ്ചായത്ത് സെക്രട്ടറിയുടെ മൗനാനുവാദത്തോടെ നടക്കുകയാണെന്നും സമരസമിതി ആരോപിക്കുന്നുണ്ട്.