ഓടനാവട്ടത്ത്​ വീട്ടിൽ മോഷണം; പണവും സ്വർണവും അപഹരിച്ചു

ചിത്രം - കൊട്ടാരക്കര: ഓനാവട്ടം പരുത്തിയറ വീട്ടിൽ നടന്ന മോഷണത്തിൽ 47,000 രൂപയും 10 പവൻ സ്വർണവും അപഹരിച്ചു. ഓടനാവട്ടം പരുത്തിയറ സ്വദേശി പൗലോസിന്‍റെ ജെ.കെ.സി വില്ലയിലാണ് മോഷണം നടന്നത്. വ്യാഴാഴ്ച പുലർച്ച 1.30ന് ​സുഹൃത്തിനെ എയർ പോർട്ടിൽ കൊണ്ടുവിടുന്നതിനായി വിമാനത്താവളത്തിൽ പോയി രാവിലെ ആറോടെ, തിരികെ വന്നപ്പോൾ വീടിന്‍റെ മുൻവാതിൽ കുത്തിത്തുറന്നനിലയിലായിരുന്നു. മുറിയിൽ തുറന്നു കിടന്ന അലമാരയിൽനിന്ന് സ്വർണവും ബാഗിൽ സൂക്ഷിച്ചിരുന്ന പണവും അപഹരിച്ചു. മക്കൾ വിദേശത്തായതിനാൽ പൗലോസ്​ ഒറ്റക്കാണ് വീട്ടിൽ കഴിയുന്നത്. മുകളിലത്തെനിലയിൽ കയറിയ മോഷ്ടാവ് പുസ്​തകങ്ങളും തുണികളും വലിച്ച് വാരി ഇട്ടിട്ടുണ്ട്​. പെട്രോൾ പമ്പിലെ സി.സി ടി.വി പരിശോധിച്ചതിൽ മോഷ്ടാക്കൾ എത്തിയതായി സംശയിക്കുന്ന കാർ കണ്ടെത്തി. കൊല്ലത്ത് നിന്ന് ഡോഗ് സ്​ക്വാഡും വിരലടയാള വിദഗ്ധരും സ്ഥലത്തെത്തി പരിശോധ നടത്തി. പൂയപ്പള്ളി പൊലീസ്​ കേസെടുത്ത് അന്വേഷണം ആരംഭിച്ചു.