സ്വാതന്ത്ര്യസമര സ്‌മൃതിയാത്ര

കൊട്ടിയം: സ്വാതന്ത്ര്യത്തിന്‍റെ 75ാമത്​ വാർഷിക ആഘോഷങ്ങളുടെ ഭാഗമായി ഉമയനല്ലൂർ സമൃദ്ധി സ്വാശ്രയ കർഷകസമിതി സംഘടിപ്പിച്ചു. മഹാത്മഗാന്ധി സന്ദർശിച്ച പന്മന ആശ്രമത്തിലേക്കാണ് യാത്ര സംഘടിപ്പിച്ചത്. രാവിലെ ഉമയനല്ലൂർ സമൃദ്ധി അങ്കണത്തിൽ യാത്രാ ക്യാപ്​റ്റന്മാർക്ക് പതാക കൈമാറി സമൃദ്ധി ചെയർമാൻ ഷാജി ഉദ്ഘാടനം ചെയ്തു. സമൃദ്ധി സ്വാശ്രയ കർഷകസമിതിയുടെയും യുവജന വിഭാഗമായ യുവസമൃദ്ധിയുടെയും പ്രവർത്തകർ പ​ങ്കെടുത്തു. മഹാത്മജിയുടെ സ്‌മൃതി മണ്ഡപം, ആശ്രമ സ്ഥാപകനും സ്വാതന്ത്ര്യസമര പോരാളിയുമായ കുമ്പളത്ത്​ ശങ്കുപ്പിള്ളയുടെ സ്‌മൃതികുടീരം, ചട്ടമ്പിസ്വാമി സ്‌മൃതി മണ്ഡപം എന്നിവിടങ്ങളിൽ പുഷ്‌പാർച്ചന നടത്തി. സമൃദ്ധി വൈസ് ചെയർമാൻ ആർ. രതീഷ്, ജോയന്‍റ്​ കൺവീനർ നജുമുദ്ദീൻ ചാത്തിനാംകുളം, യുവസമൃദ്ധി പ്രസിഡന്‍റ്​ നന്ദു, കൺവീനർ അക്ഷയ്, കണ്ണൻ, രതീഷ് എന്നിവർ നേതൃത്വം നൽകി. അംഗൻവാടി കെട്ടിടം ഉദ്​ഘാടനം ചെയ്തു അഞ്ചാലുംമൂട്: തൃക്കരുവ പഞ്ചായത്തിന്‍റെ മെയിന്‍റനൻസ് ഫണ്ട്‌ ഉപയോഗിച്ച് പൂർത്തീകരിച്ച 66ാം നമ്പർ അംഗൻവാടിയുടെ പുതിയ കെട്ടിടത്തിന്‍റെ ഉദ്ഘാടനം പഞ്ചായത്ത്‌ പ്രസിഡന്‍റ്​ സരസ്വതി രാമചന്ദ്രൻ നിർവഹിച്ചു. വികസനകാര്യ സ്റ്റാൻഡിങ്​ കമ്മിറ്റി ചെയർമാൻ അജ്മീൻ എം. കരുവ അധ്യക്ഷത വഹിച്ചു. പഞ്ചായത്തംഗം സുജിത്, ജില്ല പഞ്ചായത്ത്‌ മെംബർ ബി. ജയന്തി, ബ്ലോക്ക്​ പഞ്ചായത്തംഗം എസ്. ഷെഹിന, മറ്റ്​ വാർഡ് മെംബർമാർ, തൃക്കരുവ, തൃക്കടവൂർ ഐ.സി.ഡി.എസ് സൂപ്പർവൈസർമാർ, അംഗൻവാടി അധ്യാപകർ, ഹെൽപ്പേഴ്സ്, രക്ഷാകർത്താക്കൾ എന്നിവർ പങ്കെടുത്തു.