സ്വകാര്യ എസ്റ്റേറ്റുകളിലെ ജലപാതങ്ങൾ ഭീഷണി

മതിയായ സുരക്ഷാസംവിധാനം ഇല്ലാത്തതിനാൽ അപകട സാധ്യത ഏറെയാണ് പുനലൂർ: കിഴക്കൻ മലയോര മേഖലയിലെ സ്വകാര്യ റബർ എസ്റ്റേറ്റുകളിലെ വെള്ളച്ചാട്ടങ്ങൾ അപകട ഭീഷണി ഉയർത്തുന്നു. വെള്ളം ഉയർന്നതോടെ ഈ ജലപാതങ്ങൾ കാണാനും കുളിക്കാനും തമിഴ്നാട്ടിൽനിന്ന്​ അടക്കം നിരവധിപേർ വരുന്നുണ്ട്. അമ്പനാട്, വെഞ്ച്വർ, പൂത്തോട്ടം മേക്കാട് തുടങ്ങിയ സ്ഥലങ്ങളിലാണ് ആകർഷകമായ വെള്ളച്ചാട്ടങ്ങൾ. വനത്തോട് ചേർന്ന് ഒറ്റപ്പെട്ട സ്ഥലങ്ങളിലാണ് ഇവയുള്ളത്. എസ്റ്റേറ്റിലെ ജീവനക്കാരുടെയും തൊഴിലാളികളുടെയും സഹായത്തോടെയാണ് പുറത്തുനിന്നുള്ളവർ ഇവിടെത്തുന്നത്. ആളുകളെ കൊണ്ടുവരുന്നതിന് കഴുതുരുട്ടിയിൽ ഡ്രൈവർമാരായ ചില ഏജന്‍റുമാരുമുണ്ട്. ആളുകളിൽനിന്ന്​ നിശ്ചിത തുക വാങ്ങിയാണ് കടത്തിവിടുന്നത്. അനധികൃത വെള്ളച്ചാട്ടങ്ങളിൽ മതിയായ സുരക്ഷ സംവിധാനം ഇല്ലാത്തതിനാൽ അപകട സാധ്യത ഏറെയാണ്​. ഇവിടെ കാട്ടുമൃഗങ്ങളുടെ സാന്നിധ്യവുമുണ്ട്​. ഇതിൽ അമ്പനാട് അച്ചൻകോവിൽ വനം അധികൃതർ ആളുകളെ കയറ്റിവിടുന്നത് തടഞ്ഞിട്ടുണ്ടെങ്കിലും ഫലമില്ല. മറ്റ് വെള്ളച്ചാട്ടങ്ങളിൽ യാതൊരു നിയന്ത്രണവും അധികൃതർ വരുത്തിയിട്ടില്ല.