വെട്ടിക്കവല ഐ.ടി.ഐക്ക് അവഗണന

കൊട്ടാരക്കര: രണ്ടുകോടി രൂപയുടെ ഹൈ.ടെക് കെട്ടിടം പണിത് സൗകര്യങ്ങളും സജ്ജമായെങ്കിലും വെട്ടിക്കവല പാലമുക്കിലെ പട്ടികജാതി വികസന വകുപ്പ് ഐ.ടി.ഐയിൽ പുതിയ കോഴ്സുകൾ മാത്രം എത്തിയില്ല. 21 വിദ്യാർഥികളുള്ള ഒരുവർഷത്തെ കാർപന്‍റർ കോഴ്സ്​ മാത്രമാണ് ആരംഭകാലം മുതലുള്ളത്. പുതിയ കോഴ്സ്​ വേണമെന്ന ആവശ്യത്തിന് ഐ.ടി.ഐ ആരംഭിച്ച 1992 മുതൽ പഴക്കമുണ്ട്. നിവേദനങ്ങളും പരാതികളും നൽകുന്നുണ്ടെങ്കിലും തീരുമാനമായിട്ടില്ല. രണ്ട് വർഷം മുമ്പാണ് കിഫ്ബി പദ്ധതിയിൽ രണ്ട് കോടി രൂപയുടെ ബഹുനില കെട്ടിടം നിർമിച്ചത്. പുതിയ കോഴ്സ്​ ഉടനെത്തുമെന്ന് പ്രഖ്യാപനവുമുണ്ടായി. പട്ടികജാതി വിദ്യാർഥികളുടെ പഠനത്തിന് മുൻഗണന നൽകി ആരംഭിച്ച സ്​ഥാപനമാണിത്. 80 ശതമാനം സീറ്റുകൾ പട്ടിക വിഭാഗത്തിനും സംവരണം ചെയ്തിരിക്കുന്നു. സിവിൽ, വെൽഡർ, ഫിറ്റർ, സർവേയർ കോഴ്സുകൾ അടിയന്തരമായി ആരംഭിക്കണമെന്നാണ് ആവശ്യം. കോഴ്സുകൾ ആരംഭിക്കുന്നതിന് പട്ടികജാതി വികസന വകുപ്പിന് പട്ടികജാതി വികസനവകുപ്പിനും അനുകൂല നിലപാടാണ്. എന്നാൽ ചില വകുപ്പുകൾ നടപടി വൈകിക്കുകയാണെന്നാണ് പരാതി.