മൃതദേഹ കോവിഡ്​ പരിശോധന നടത്തിയില്ല; ജില്ല പബ്ലിക് ഹെൽത്ത്​ ലാബ് ഓഫിസർക്ക് കാരണം കാണിക്കാൻ നോട്ടീസ്

kc _ kw കൊല്ലം: ജില്ല പബ്ലിക് ഹെൽത്ത്​ ലാബിൽ മൃതദേഹ കോവിഡ്​ പരിശോധന നടത്തുന്നില്ല. കരുനാഗപ്പള്ളി താലൂക്കാശുപത്രിയിലേക്ക് കൊണ്ടു വരുംവഴി മരിച്ച ചവറ സ്വദേശിനിയുടെ കോവിഡ്​ പരിശോധനയാണ് നടത്താൻ കഴിയാതായത്. പരാതിയെതുടർന്ന് ലാബ് ഓഫിസർക്ക് ജില്ല മെഡിക്കൽ ഓഫിസർ കാരണം കാണിക്കാൻ നോട്ടീസ് നൽകി. ട്രൂനാറ്റ് പരിശോധന നടത്താത്തതിന് കാരണം ചൊവ്വാഴ്ച ഉച്ചക്ക് മുമ്പ് നേരിട്ടെത്തി ബോധിപ്പിക്കാനാണ് നിർദേശം. ലാബിൽ ആളില്ലെന്ന കാരണം പറഞ്ഞ് പരിശോധന നടത്തിയില്ലെന്നും വിവരം അനുബന്ധ സ്ഥാപനങ്ങളെ യഥാസമയം അറിയിച്ചില്ലെന്നും നോട്ടീസിൽ പറയുന്നു. ലാബ് ടെക്നീഷ്യനെ രജിസ്ട്രേഷൻ കൗണ്ടറിൽ ഡ്യൂട്ടിക്ക് നിയോഗിച്ചിരുന്നെന്നും ബോധ്യപ്പെട്ടിട്ടുണ്ട്. കോവിഡ് കേസുകൾ വർധിച്ചുവരുന്ന സാഹചര്യത്തിൽ പി.പി.പി.ഇ കിറ്റ് ധരിച്ച് മൃതദേഹ പരിശോധന നടത്തണമെന്ന് ജില്ല മെഡിക്കൽ ഓഫിസർ ബന്ധപ്പെട്ട ആശുപത്രി അധികൃതർക്ക് നിർദേശം നൽകി.