ആംബുലന്‍സ് താഴ്ചയിലേക്ക് മറിഞ്ഞു

കുളത്തൂപ്പുഴ: കുളത്തൂപ്പുഴ-അഞ്ചല്‍ പാതയില്‍ പതിനൊന്നാംമൈലിന്​ സമീപത്തെ വളവില്‍ നിയന്ത്രണം വിട്ട സ്വകാര്യ ആംബുലന്‍സ് താഴ്ചയിലെ റബര്‍ തോട്ടത്തിലേക്ക് മറിഞ്ഞു. ഡ്രൈവര്‍ നിസ്സാര പരിക്കുകളോടെ രക്ഷപ്പെട്ടു. തിരുനെല്‍വേലിയില്‍ നിന്ന്​ രോഗിയെ കൊണ്ടുവരുന്നതിനായി അഞ്ചലില്‍നിന്ന്​ പുറപ്പെട്ട വാഹനമാണ് അപകടത്തില്‍പെട്ടത്. അപകടം നടക്കുമ്പോള്‍ ഡ്രൈവര്‍ മാത്രമാണ് വാഹനത്തിലുണ്ടായിരുന്നത്. പാതയുടെ വശത്തെ സംരക്ഷണഭിത്തിക്ക്​ മുകളിലൂടെ മുപ്പതടിയോളം താഴ്ചയിലേക്ക് പതിച്ച വാഹനം സമീപത്തെ മരത്തില്‍ തട്ടി നില്‍ക്കുകയായിരുന്നു.