പൊതുജനാരോഗ്യ ബില്ലിലെ അപാകതകൾ പരിഹരിക്കണമെന്ന്​ ഐ.എച്ച്.എം.എ

കൊല്ലം: 2021ലെ കേരള പൊതുജനാരോഗ്യ ബില്ലിലെ വ്യവസ്ഥകൾ പലതും ഹോമിയോപ്പതി ഉൾപ്പെടെ ആയുഷ് വിഭാഗങ്ങളെ അവഗണിക്കുകയും പാർശ്വവത്​കരിക്കുകയും ചെയ്യുന്നതാണെന്ന്​ ഐ.എച്ച്.എം.എ. പുതിയ ബിൽ പ്രകാരം തീരുമാനങ്ങളെടുക്കാനും നടപ്പാക്കാനുമുള്ള അധികാരം സംസ്ഥാന, ജില്ല, താലൂക്ക് തലങ്ങളിലെല്ലാം അലോപ്പതി വിഭാഗത്തിന് മാത്രമാണ്​. ആയുഷ് വിഭാഗങ്ങളിലെ പ്രതിനിധികളെക്കൂടി ഉൾപ്പെടുത്തി കമ്മിറ്റിയുണ്ടെങ്കിൽ മാത്രമേ ഇതര വൈദ്യ ശാസ്ത്രങ്ങളുടെ ഫലപ്രദമായ ഇടപെടൽ പൊതുജനാരോഗ്യ രംഗത്ത് ഉറപ്പുവരുത്താനാകൂ. മുൻ കാലങ്ങളിൽനിന്ന് വിരുദ്ധമായി സാംക്രമിക രോഗങ്ങൾ ശ്രദ്ധയിൽപെട്ടാൽ ഇതര വൈദ്യശാസ്ത്രങ്ങളിലെ ഡോക്ടർമാരും ഈ ബിൽ വ്യവസ്ഥ പ്രകാരം അറിയിക്കേണ്ടത് അലോപ്പതി അധികാരികളെയാണ്. ചിക്കൻപോക്സ് പോലുള്ള സാംക്രമിക രോഗങ്ങൾ ചികിത്സിക്കാമെങ്കിലും അസുഖം ഭേദമായെന്ന് സർട്ടിഫിക്കറ്റ് നൽകാനുള്ള അധികാരം ഇപ്പോൾ അലോപ്പതി ഡോക്ടർമാർക്ക് മാത്രമാക്കി. ആയുഷ് ഡോക്ടർമാരിൽനിന്ന്​ ഫലപ്രദമായി ചികിത്സ നേടുന്നവരും ഫിറ്റ്നസ് സർട്ടിഫിക്കറ്റിന്​ മോഡേൺ മെഡിസിൻ ഡോക്ടറെ സമീപിക്കണമെന്നത് ഇതര വൈദ്യശാസ്ത്രത്ത ആശ്രയിക്കുന്നവർക്ക് ബുദ്ധിമുട്ടും ധനനഷ്ടവും ഉണ്ടാക്കും. ഇത്തരം വ്യവസ്ഥകൾ പുതിയ ബില്ലിൽനിന്ന്​ ഒഴിവാക്കണമെന്നും ആയുഷ് വിഭാഗങ്ങളിലെ വിദഗ്​ധരുടെ അഭിപ്രായങ്ങൾകൂടെ പരിഗണിച്ച് പൊതുജനങ്ങൾക്ക് ഏറ്റവും സ്വീകാര്യമായ ബിൽ പ്രാബല്യത്തിൽ വരുത്തണമെന്നും കേരള ഐ.എച്ച്.എം.എ പ്രസിഡന്‍റ്​ ഡോ. ഷാജിക്കുട്ടി, ജനറൽ സെക്രട്ടറി ഡോ. കൃഷ്ണകുമാർ ചെമ്പൻകുളം എന്നിവർ ആവശ്യപ്പെട്ടു.