പദ്ധതികള്‍ വിലയിരുത്തി ആസൂത്രണസമിതി

കൊല്ലം: നടപ്പ് സാമ്പത്തികവര്‍ഷം തദ്ദേശ സ്വയംഭരണസ്ഥാപനങ്ങള്‍ വിഭാവനം ചെയ്ത പദ്ധതികളുടെ രൂപവത്​കരണ നടപടികള്‍ ജില്ല ആസൂത്രണ സമിതി വിലയിരുത്തി. ജില്ല ആസൂത്രണ സമിതി സെക്ര​േട്ടറിയറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ ജില്ല പഞ്ചായത്ത് പ്രസിഡന്‍റ്​ സാം കെ. ഡാനിയല്‍ അധ്യക്ഷത വഹിച്ചു. ഗ്രാമ-ബ്ലോക്ക്-ജില്ല പഞ്ചായത്തുകള്‍ സംയോജിതമായി നടപ്പാക്കുന്നതിനായി തയാറാക്കിയ പദ്ധതികളെക്കുറിച്ച് ചര്‍ച്ച ചെയ്തു. ഭിന്നശേഷി വിഭാഗത്തിൽ​െപട്ട കുട്ടികള്‍ക്ക് വേണ്ടിയുള്ള പദ്ധതികള്‍ സമയബന്ധിതമായി നടപ്പാക്കുന്നതിനായി ഉദ്യോഗസ്ഥര്‍ കൃത്യമായി കണക്കുകള്‍ നല്‍കണമെന്ന് യോഗം നിർദേശം നല്‍കി. മൂല്യവര്‍ധിത ഉൽപന്നങ്ങള്‍ക്ക് വിപണി കണ്ടെത്തുന്നതിനായി വ്യവസായങ്ങള്‍ ആരംഭിക്കുന്നതിന് തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ പദ്ധതികള്‍ രൂപവത്​കരിക്കണമെന്നും യോഗം നിര്‍ദേശിച്ചു. ഓച്ചിറ ബ്ലോക്ക് പഞ്ചായത്ത്, വുമണ്‍ വെല്‍ഫെയര്‍ ഓഫിസ്, ചിറ്റുമല ബ്ലോക്ക്, ജില്ല വ്യവസായ കേന്ദ്രം, പൂതക്കുളം ഗ്രാമപഞ്ചായത്ത് 2021-2022 സാമ്പത്തിക വര്‍ഷം ആവിഷ്‌കരിച്ച് വിജയിച്ച മാതൃക പദ്ധതികളെക്കുറിച്ച് യോഗത്തില്‍ വിശദീകരിച്ചു. ജില്ല പ്ലാനിങ് ഓഫിസര്‍ പി.ജെ. ആമിന, ജില്ല ആസൂത്രണ സമിതി അംഗങ്ങളായ വസന്താരമേശ്, ബി. ജയന്തി, വിവിധ തദ്ദേശ സ്ഥാപന പ്രതിനിധികള്‍, ജില്ലതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.