കല്ലുവാതുക്കൽ മദ്യദുരന്തക്കേസ്​:​ സമാതകളില്ലാത്ത ​നിയമവഴികൾ..

* തെളിവുകളായി കന്നാസ്​ മുതൽ ​ ടാങ്കർ ലോറി വരെ കൊല്ലം: 'ഡിപ്പാർട്മെന്‍റിൽ നിന്ന്​ തന്നെയാണ്​ ഏറ്റവും വലിയ വെല്ലുവിളി നേരിട്ടത്'​ വിചാരണക്കൊടുവിൽ കല്ലുവാതുക്കൽ വിഷമദ്യദുരന്തക്കേസിൽ മണിച്ചൻ ഉൾപ്പെടെ പ്രതികൾക്ക്​ ശിക്ഷ ലഭിച്ചപ്പോൾ അന്വേഷണത്തിന്​ നേതൃത്വം നൽകിയ ഐ.ജിയായിരുന്ന സിബി മാത്യൂസിന്‍റെ പ്രതികരണം ഇങ്ങനെയായിരുന്നു. പൊലീസ്​, എക്സൈസ്​ ഉദ്യോഗസ്ഥർ തമ്മിൽ തുറന്ന യുദ്ധമായിരുന്നു തങ്ങൾ നേരിട്ടതെന്നും അ​ദ്ദേഹം വെളിപ്പെടുത്തി. സിബി മാത്യൂസിനെ കൊല്ലാൻ ഗൂഢാലോചന നടത്തിയതിനുൾപ്പെടെ ശിക്ഷ ​പ്രതി മണിച്ചന്​ ലഭിച്ചതും ഇതിനൊപ്പം ചേർത്തുവായിക്കണം. ഇതുകൂടാതെയാണ്​ തന്നെ പ്രോസിക്യൂട്ടർ സ്ഥാനത്ത്​ നിന്ന്​ നീക്കാൻ ചിലർ ശ്രമിച്ചു എന്നുള്ള സ്​പെഷൽ പ്രോസിക്യൂട്ടർ ആയിരുന്ന അഡ്വ. വി. സുഗതന്‍റെ വാക്കുകൾ. തുടക്കം മുതൽ ഒടുക്കം വരെ മണിച്ചൻ ഉൾപ്പെടെ പ്രതികളെ രക്ഷിച്ചെടുക്കാൻ രാഷ്ട്രീയക്കാരും ഉദ്യോഗസ്ഥരുമായ ഇഷ്ടക്കാർ നടത്തിയ ശ്രമങ്ങൾ ശക്തമായ തെളിവുകൾ നിരത്തിയാണ്​ പ്രത്യേക അന്വേഷണ സംഘവും പ്രോസിക്യൂഷനും പൊളിച്ചത്​. ശിക്ഷിക്കേണ്ടവർ തന്നെ രക്ഷകർ ആയതുകൊണ്ടാണല്ലോ 31 ജീവനുകൾ അപഹരിക്കുകയും നൂറുകണക്കിന്​ പേർക്ക്​ ജീവിതകാലം മുഴുവൻ ദുരിതം ബാക്കിയാക്കുകയും ചെയ്ത കേസ്​ തന്നെ ഉണ്ടായത്​. വിചാരണയുടെ ഓരോ ഘട്ടത്തിലും കേരളം സസൂക്ഷ്മം നിരീക്ഷിച്ച കേസിൽ നിരവധി വിവാദങ്ങളാണ്​ ഉണ്ടായത്​. മണിച്ചനും കൂട്ടരും മദ്യത്തിലൂടെ വിഷം വിളമ്പി എന്ന്​ തെളിയിക്കാൻ പ്രതികൾ സ്പിരിറ്റ്​ വാങ്ങിയ ബംഗളൂരുവിലെ കമ്പനിയിൽ നിന്നുള്ള രേഖകൾ വരെ കൊണ്ടുവരേണ്ടിവന്നു അന്വേഷണസംഘത്തിന്​. ഓരോ തെളിവും കോർത്തിണക്കിയുള്ള ആ പോരാട്ടത്തിന്​ ടാങ്കർ ലോറി മുതൽ കന്നാസ്​ വരെ കരുത്തുപകർന്നു. ഒടുവിൽ പ്രതികൾക്ക്​ അർഹിച്ച ശിക്ഷ കിട്ടിയപ്പോൾ തങ്ങളുടെ കഷ്ടപ്പാടിനെല്ലാം വിലയുണ്ടായി എന്നതായിരുന്നു അന്വേഷണസംഘത്തിന്‍റെയും പ്രോസിക്യൂഷന്‍റെയും സംതൃപ്തി. ...................... ശരിക്കും വെല്ലുവിളിയായിരുന്നു കല്ലുവാതുക്കൽ വിഷമദ്യദുരന്തക്കേസ്​ അന്വേഷണം. കരിയറിൽ തെളിവുകൾ കണ്ടെത്താനും കേസ്​ തെളിയിക്കാനും ഇത്രയും കഷ്ടപ്പെട്ട ചുരുക്കം കേസുകളേ ഉണ്ടായിട്ടുള്ളൂ. അന്ന്​ അന്വേഷണ സംഘത്തിൽ ഉണ്ടായിരുന്ന ഓരോ ഉദ്യോഗസ്ഥനും ആ കഷ്ടപ്പാടിൽ പങ്കാളികളായിരുന്നു. പൂർണാർഥത്തിൽ ഒരു ടീം വർക്കായിരുന്നു കല്ലുവാതുക്കൽ കേസ്​. പ്രതികൾക്ക്​ ശിക്ഷ ലഭിച്ചത്​ ഞങ്ങൾക്കെല്ലാം ജീവിതത്തിലെ ഏറ്റവും സംതൃപ്​തി നൽകിയ സംഭവമായിരുന്നു. ഇപ്പോൾ ശിക്ഷ അനുഭവിച്ച്​ മണിച്ചൻ പുറത്തിറങ്ങുന്നത്​ നിയമം ഓരോ വ്യക്തിക്കും നൽകുന്ന ആനുകൂല്യങ്ങൾ അനുസരിച്ചാകുമ്പോൾ അതിൽ മറിച്ചൊരു അഭിപ്രായം ആർക്കും ഉണ്ടാകാനിടയില്ല. -ജയൻ സി. നായർ, കല്ലുവാതുക്കൽ വിഷമദ്യ ദുരന്തക്കേസ് അന്വേഷണ സംഘാംഗം