മെഗാ അദാലത്​: പൊലീസിനെതിരെ ബാർ അസോസിയേഷൻ

കൊട്ടാരക്കര: ജൂൺ 26ന് കൊട്ടാരക്കര കോടതിയിൽ നടക്കുന്ന മെഗാ അദാലത്തുമായി ബന്ധപ്പെട്ട്​ കൊട്ടാരക്കര പൊലീസിനെതിരെ ബാർ അസോസിയേഷൻ. പെറ്റി കേസുകളുടെ പിഴത്തുക അടക്കുന്നതിൽ പൊലീസ്​ ഇടപെടുന്നത്​ അനധികൃതമാണെന്ന്​ അസോസിയേഷൻ ഭാരവാഹികൾ ആരോപിച്ചു. അദാലത്തിൽ അടക്കാനുള്ള പണം പൊലീസ്​ വാങ്ങി കോടതിയിൽ അടക്കുന്നത്​ നിയമവിരുദ്ധമാണെന്നാണ്​ ആക്ഷേപം. അദാലത്തിന്‍റെ പേരിൽ പൊലീസ്​ വ്യക്തികളിൽനിന്ന്​ കൂട്ടമായി പണം പിരിച്ച് അഭിഭാഷകരെ ഒഴിവാക്കി കോടതിയിൽ പണം അടക്കുകയാണ് ചെയ്യുന്നത്. പണമടക്കാൻ സഹായം നൽകും എന്ന നിലയിൽ പൊലീസ്​ പുറത്തുവിട്ട അറിയിപ്പ്​ വ്യാജവിവരം പ്രചരിപ്പിക്കലാണെന്നും അവർ കുറ്റപ്പെടുത്തി. ഇത്​ ചൂണ്ടികാട്ടി ജില്ല ജഡ്ജി, ഹൈകോടതി, കൊട്ടാരക്കര എസ്​.പി, മുഖ്യമന്ത്രി എന്നിവർക്ക് പരാതി നൽകി. പൊലീസ്​ നടപടിക്കെതിനെതിരെ സമര പരിപാടികൾ നടത്തുമെന്ന്​ ബാർ അസോസിയേഷൻ പ്രസിഡന്‍റ്​ ആർ. സുനിൽകുമാർ, സെക്രട്ടറി ആർ.അജി എന്നിവർ അറിയിച്ചു. അതേസമയം, കഴിഞ്ഞമാസം 27ന് കൊട്ടാരക്കര പൊലീസ്​ ​സ്​റ്റേഷനിൽ ബാർ അസോസിയേഷൻ സെക്രട്ടറി അഡ്വ. ആർ. അജിക്ക്​ മർദനമേറ്റതും തുടർന്ന്​ പൊലീസും അഭിഭാഷകരും കൊമ്പുകോർത്തതുമായ സംഭവത്തിന്‍റെ തുടർച്ചയാണ്​ പുതിയ സംഭവവികാസങ്ങൾ. മർദനമേറ്റ സംഭവത്തെ തുടർന്ന്​ അഭിഭാഷകർ പൊലീസ്​ സ്​റ്റേഷൻ ഉപരോധിക്കുകയും പ്രതിഷേധത്തെ തുടർന്ന്​ വിശ്വനാഥൻ എന്ന പൊലീസുകാരനെ സ്ഥലംമാറ്റുകയും ചെയ്തിരുന്നു. ഈ ഉദ്യോഗസ്ഥനെതിരെയും കുറ്റക്കാരായ മറ്റുള്ളവർക്കെതിരെയും നിയമനടപടി സ്വീകരിക്കണമെന്ന ആവശ്യവും അഭിഭാഷകർ ഉയർത്തുന്നുണ്ട്​.