കേന്ദ്ര സർക്കാറിന്‍റെ എട്ടാം വാർഷികാഘോഷം

കൊല്ലം: നരേന്ദ്ര മോദി സർക്കാറിന്‍റെ എട്ടാം വാർഷികം വിപുലമായ പരിപാടികളോടെ ജില്ലയിൽ ആഘോഷിക്കുമെന്ന് ബി.​ജെ.പി​ ജില്ല പ്രസിഡന്‍റ്​ ബി.ബി. ഗോപകുമാർ വാർത്തസമ്മേളനത്തിൽ അറിയിച്ചു. 15 ദിവസം നീളുന്ന പരിപാടികൾക്ക്​ തുടക്കമായി. ജില്ലതല ഉദ്ഘാടനം വെട്ടിക്കവലയിൽ മുതിർന്ന നേതാവ്​ ഒ. രാജഗോപാൽ നിർവഹിച്ചു. മഹാജനസമ്പർക്ക പരിപാടികളുടെ ഭാഗമായി കേന്ദ്ര പദ്ധതികൾ വിശദമാക്കുന്ന ലഘുലേഖകൾ ബൂത്തുതലത്തിൽ വീടുകളിൽ വിതരണം ചെയ്യും. കേന്ദ്ര പദ്ധതികളുടെ ഗുണഭോക്താക്കളുടെ സംഗമങ്ങളും യുവമോർച്ചയുടെ നേതൃത്വത്തിൽ ബൈക്ക് റാലികളും സംഘടിപ്പിക്കും. കർഷകർ, പട്ടികജാതി-വർഗ കോളനി നിവാസികൾ, പി​ന്നാക്ക വിഭാഗങ്ങൾ, വനിതകൾ, യുവാക്കൾ, എഴുത്തുകാർ, സാംസ്കാരിക പ്രതിഭകൾ എന്നിവരെ കോർത്തിണക്കിയുള്ള സമ്പർക്ക പരിപാടികളും നടത്തും. ആരോഗ്യ സന്നദ്ധ പ്രവർത്തകരെ ആദരിക്കും. ജില്ലതലത്തിൽ ഗരീബ്​ കല്യാൺ യോജന ജനസഭ എന്ന പേരിൽ സമ്മേളനവും സംഘടിപ്പിക്കും. വാർത്തസമ്മേളനത്തിൽ ജില്ല ജനറൽ സെക്രട്ടറി അഡ്വ. വി. വിനോദ്, ദക്ഷിണ മേഖല സെക്രട്ടറി ജിതിൻ ദേവ് എന്നിവരും പങ്കെടുത്തു.