വീട്ടിൽ അതിക്രമിച്ച് കയറി യുവതിയെ ഉപ​ദ്രവിച്ച ആൾ പിടിയിൽ

ഇരവിപുരം: വീട്ടിൽ അതിക്രമിച്ച് കയറി യുവതിയെ ശാരീരികമായി ഉപദ്രവിച്ചയാളെ ഇരവിപുരം പൊലീസ് അറസ്റ്റ് ചെയ്തു. വടക്കേവിള ശ്രീവിലാസം നഗർ മുസ്​ലിയാർ ബിൽഡിങ്ങിൽ എസ്. ഷഹനാദ് ആണ് (31) പിടിയിലായത്. 28ന് രാത്രി 7.30 ന് യുവതിയുടെ വീട്ടിൽ അതിക്രമിച്ചു കടന്ന് ഫോൺ നമ്പർ ആവശ്യപ്പെട്ടു. നൽകാത്തതിലുള്ള വിരോധം മൂലം യുവതിയുടെ ശരീരത്തിൽ കടന്നു പിടിച്ച് മാനഹാനി വരുത്താൻ ശ്രമിക്കുകയായിരുന്നെന്ന് പൊലീസ് പറഞ്ഞു. ഇരവിപുരം ഇൻസ്​പെക്ടർ വി.വി. അനിൽകുമാറിന്‍റെ നേതൃത്വത്തിൽ എസ്​.ഐമാരായ അരുൺഷാ, ജയേഷ്, അജിത്​കുമാർ എന്നിവരടങ്ങിയ സംഘമാണ് അറസ്റ്റ് ചെയ്തത്. കോടതിയിൽ ഹാജരാക്കി റിമാൻഡ് ചെയ്തു. സ്ഥിരമായി മോഷണ മുതൽ വാങ്ങുന്ന ആക്രിക്കട ഉടമയും മോഷ്​ടാവും പിടിയിൽ കൊല്ലം: സ്ഥിരമായി മോഷണ മുതൽ വാങ്ങുന്ന ആക്രിക്കട ഉടമയെയും മോഷ്​ടാവിനെയും കൊല്ലം ഈസ്റ്റ് പൊലീസ്​ പിടികൂടി. അഷ്​ടമുടി, കണ്ണാടിമുക്ക്, ഉത്രാടം വീട്ടിൽ ചുടലമുത്തു(20), തൃക്കരുവ കാഞ്ഞാവെളി, തെക്കേചേരി, എം.കെ മൻസിലിൽ അബ്ദുൽ റഷീദ് (33) എന്നിവരാണ് പിടിയിലായത്. കഴിഞ്ഞ 27ന്​ രാവിലെ കൊല്ലം റെയിൽവേ സ്റ്റേഷന് മുൻവശം പാർക്ക് ചെയ്തിരുന്ന ബൈക്ക്​ മോഷണം പോയതിനെ തുടർന്ന് വാഹന ഉടമ വടക്കേവിള മണി നിവാസിൽ സുമേഷ് കുമാർ നൽകിയ പരാതിയെ തുടർന്ന് റെയിൽവേ സ്റ്റേഷനും പരിസരവും കേന്ദ്രീകരിച്ച് നടത്തിയ നിരീക്ഷണത്തിൽ സംശയാസ്​പദമായ സാഹചര്യത്തിൽ കണ്ട ചുടലമുത്തുവിനെ ചോദ്യം ചെയ്തതോടെയാണ്​ മോഷണത്തിന്‍റെ ചുരുൾ അഴിഞ്ഞത്. കൊല്ലം നഗരത്തിൽ വിവിധ ഇടങ്ങളിൽ കറങ്ങിനടന്ന് മോട്ടോർ സൈക്കിളുകളും മറ്റും മോഷണം നടത്തുകയും ഇത്തരത്തിൽ മോഷ്​ടിച്ചെടുക്കുന്നവ ആക്രിക്കടയിൽ എത്തിച്ച് പൊളിച്ച് വിൽക്കുന്നതുമാണ് ഈ സംഘത്തിന്‍റെ രീതിയെന്ന്​ പൊലീസ്​ പറയുന്നു. കൊല്ലം എ.സി.പി ജി.ഡി. വിജയകുമാറിന്‍റെ മേൽനോട്ടത്തിൽ കൊല്ലം ഈസ്റ്റ് എസ്​.എച്ച്.ഒ ആർ. രതീഷിന്‍റെ നേതൃത്വത്തിൽ എസ്​.ഐമാരായ വൈ. അഷ്​റഫ്, ജയിംസ്​, സി.പി.ഒ സുനിൽ എന്നിവർ ഉൾപ്പെട്ട സംഘമാണ് പ്രതിയെ അറസ്​റ്റ് ചെയ്തത്. ഇവരെ കോടതിയിൽ ഹാജരാക്കി.