റോഡിലെ കുഴി; എൻജിനീയറെ ഉപരോധിച്ചു കുഴികൾ അടയ്​ക്കാമെന്ന്​ ഉറപ്പുനൽകി ഉദ്യോഗസ്ഥർ

മയ്യനാട്: പഞ്ചായത്ത് ഓഫിസ്, വില്ലേജ് ഓഫിസ്, ആശുപത്രി, മാർക്കറ്റ്, എന്നിവിടങ്ങളിലേക്ക്​ പോകുന്നവർ ആശ്രയിക്കുന്ന റോഡിലെ കുഴികൾ അടക്കണമെന്നാവശ്യപ്പെട്ട്​ കെ.ആർ.എഫ്.ബി എക്സിക്യൂട്ടിവ് എൻജിനീയറെ ഉപരോധിച്ചു. പഞ്ചായത്തംഗങ്ങളുടെയും കോൺഗ്രസ്, യൂത്ത്​ കോൺഗ്രസ്​ നേതാക്കളുടെയും നേതൃത്വത്തിലായിരുന്നു ഉപരോധം. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ആർ.എസ്. അബിൻ സമരം ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ്​ പി. ലിസ്റ്റൻ അധ്യക്ഷതവഹിച്ചു. പഞ്ചായത്തംഗം മയ്യനാട് സുനിൽ, ബി. ശങ്കരനാരായണപിള്ള, അഡ്വ. സന്തോഷ്, യൂത്ത് കോൺഗ്രസ് ജില്ല ജനറൽ സെക്രട്ടറിമാരായ ഷമീർ മയ്യനാട്, ശരത് കടപ്പാക്കട, സന്തോഷ് പുള്ളിവിള, സുധീർ കൂട്ടുവിള, സംഗീത് ധവളക്കുഴി എന്നിവർ നേതൃത്വം നൽകി. അടിയന്തരമായി നിർമാണം ആരംഭിക്കാമെന്ന് ഉദ്യോഗസ്ഥർ എഴുതിനൽകി.