മികച്ച കരാറുകാരെ സർക്കാർ പ്രോത്സാഹിപ്പിക്കും

കൊട്ടാരക്കര: മരാമത്ത് ജോലികൾ മികച്ച രീതിയിൽ പൂർത്തിയാക്കുന്ന കരാറുകാർക്ക് സർക്കാർ പ്രോത്സാഹനം നൽകുമെന്ന് മന്ത്രി പി.എ. മുഹമ്മദ് റിയാസ്​. മൂന്ന് കോടി രൂപ ചെലവിൽ പുനർനിർമിച്ച ചിരട്ടക്കോണം കണ്ണംകോട് ഉഗ്രൻമുക്ക് സദാന്ദപുരം സ്​കൂൾ ജങ്ഷൻ റോഡ് ഉദ്ഘാടനം ചെയ്യുകയായിരുന്നു അദ്ദേഹം. കെ.ബി. ഗണേഷ് കുമാർ എം.എൽ.എ അധ്യക്ഷതവഹിച്ചു. വെട്ടിക്കവല ഗ്രാമപഞ്ചായത്ത് പ്രസിഡന്‍റ് ഡി. സജയകുമാർ, മാർത്തോമ സഭ കൊട്ടാരക്കര പുനലൂർ ഭദ്രാസനാധിപൻ ഡോ. ജോസഫ് മാർ ബർണബാസ്​ സഫ്രഗൻ മെത്രാപ്പൊലീത്ത, വെട്ടിക്കവല ബ്ലോക്ക് പഞ്ചായത്തംഗം കെ.എം. റജി എന്നിവർ സംസാരിച്ചു. ഭാര്യയെ കാണാനില്ല, പൊലീസ്​ സ്റ്റേഷന് മുന്നിൽ ഭർത്താവിന്‍റെ ആത്മഹത്യശ്രമം കൊട്ടാരക്കര: ഭാര്യയെ കാണാനില്ലെന്ന പരാതിയിൽ നടപടി ഉണ്ടാകാത്തതിനെ തുടർന്ന് പുത്തൂർ പൊലീസ്​ സ്റ്റേഷന് മുന്നിൽ മധ്യവയസ്​കൻ മണ്ണെണ്ണയൊഴിച്ച്​ ആത്മഹത്യക്ക് ശ്രമിച്ചു. തിരുവനന്തപുരം സ്വദേശി കോട്ടാത്തല നെടുവത്തൂരിൽ വാടക വീട്ടിൽ താമസിക്കുന്ന ഷൈജു (47) ആണ് ബുധനാഴ്ച രാവിലെ 8.30 ഓടെ സ്റ്റേഷന് മുന്നിൽ ആത്മഹത്യക്ക് ശ്രമിച്ചത്. ഇയാൾ ശരീരത്ത് മണ്ണെണ്ണ ഒഴിക്കുന്നത് ശ്രദ്ധയിൽപെട്ട പൊലീസ്​ ഓടിയെത്തി തടയുകയായിരുന്നു. ഭാര്യയെ കാണാനില്ലെന്ന് കാട്ടി ഇയാൾ പരാതി നൽകിയിരുന്നു. ഒടുവിൽ തിരുവനന്തപുരത്ത് ഹോം നഴ്സായി ജോലി നോക്കിയിരുന്ന ഷൈജുവിന്‍റെ ഭാര്യയെ പൊലീസ്​ സ്റ്റേഷനിലേക്ക് കൂട്ടിക്കൊണ്ടുവന്നു.