മോഷണം നടന്ന ധനകാര്യസ്ഥാപന ഉടമ ആത്മഹത്യക്ക്​ ശ്രമിച്ചു

പത്തനാപുരം: മോഷണം നടന്ന സ്വകാര്യ ധനകാര്യസ്ഥാപനത്തിന്‍റെ ഉടമ ആത്മഹത്യക്ക്​ ശ്രമിച്ചു. പത്തനാപുരം പിടവൂര്‍ ആശാരിയഴികത്ത് വീട്ടില്‍ രാമചന്ദ്രന്‍പിള്ളയാണ് (62) ആത്മഹത്യക്ക്​ ശ്രമിച്ചത്. തിങ്കളാഴ്ചയാണ് ജനതാ ജങ്ഷനിലെ പത്തനാപുരം ബാങ്കേഴ്സിൽ മോഷണം നടന്നത്. 30 ലക്ഷം രൂപയുടെ പണവും സ്വർണവും നഷ്​ടമായിരുന്നു. വ്യാഴാഴ്ച ഉച്ചയോടെ വീടിനു മുകളില്‍ കയറി ദേഹത്ത്​ മുറിവുകള്‍ ഉണ്ടാക്കുകയും കൈയിലെ ഞരമ്പുകള്‍ മുറിക്കുകയും ചെയ്തു. വാട്ടര്‍ ടാങ്കില്‍ കൈ മുക്കി അവശനിലയില്‍ കണ്ടതിനെ തുടര്‍ന്ന് സമീപവാസികളാണ് വീട്ടുകാരെ വിവരമറിയിച്ചത്‌. ഉടന്‍തന്നെ പുനലൂര്‍ താലൂക്കാശുപത്രിയിലേക്ക് മാറ്റി. അപകടനില തരണം ചെയ്തതായി ആശുപത്രി അധികൃതര്‍ പറഞ്ഞു.