തെളിനീരൊഴുകും നവകേരളം: മലിനീകരണം കണ്ടെത്താന്‍ ജലനടത്തം

അഞ്ചല്‍: ജലാശയങ്ങളിലെ മലിനീകരണ ഉറവിടങ്ങള്‍ ശുചീകരിച്ച് സംരക്ഷിക്കുന്ന 'തെളിനീരൊഴുകും നവകേരളം' കാമ്പെയിനുമായി ബന്ധപ്പെട്ട് ഇടമുളയ്ക്കല്‍ പഞ്ചായത്തില്‍ ജലനടത്തം സംഘടിപ്പിച്ചു. അഞ്ചല്‍ ബ്ലോക്ക് പഞ്ചായത്ത് പ്രസിഡന്‍റ്​ രാധാ രാജേന്ദ്രന്‍ ഉദ്ഘാടനം ചെയ്തു. ആയൂര്‍ കൊളഞ്ഞി തോടാണ് നടത്തത്തിനായി തെരഞ്ഞെടുത്തത്. മലിനീകരണം കണ്ടെത്തിയ ഇടങ്ങളില്‍ ജനകീയ പങ്കാളിത്തത്തോടെ ശുചീകരണ യജ്ഞം നടത്തും. ഉറവിടങ്ങളില്‍നിന്നുള്ള സാമ്പിളുകള്‍ ഗുണനിലവാര പരിശോധനക്ക്​ ശേഖരിക്കും. ഇതിനായി പഞ്ചായത്തിലെ 22 വാര്‍ഡുകളിലും ജി.ഐ.എസ് മാപ്പിങ് നടത്തി. സാമ്പിളുകള്‍ ശേഖരിക്കുന്നതിനായി ബോട്ടിലുകളും കൈമാറി. ഓരോ വാര്‍ഡുകളിലും ജലസമിതി രൂപവത്​കരിച്ച് പരിശീലനം നല്‍കി. മലിനീകരണ ഉറവിടങ്ങള്‍ നിര്‍ത്തലാക്കി മാലിന്യം സംസ്‌കരിക്കുന്നതിനായി ശാസ്ത്രീയ ബദല്‍ സംവിധാനം ഒരുക്കും. ഇടമുളയ്ക്കല്‍ ഗ്രാമപഞ്ചായത്ത് പ്രസിഡന്‍റ്​ സുജ സുരേന്ദ്രന്‍ അധ്യക്ഷതവഹിച്ചു. വൈസ് പ്രസിഡന്‍റ്​ പി. രാജീവ്, ബ്ലോക്ക് - ഗ്രാമപഞ്ചായത്ത് ഭരണസമിതി അംഗങ്ങള്‍, നിര്‍വഹണ ഉദ്യോഗസ്ഥര്‍, ഹരിതകേരളം മിഷന്‍ റിസോഴ്‌സ് പേഴ്‌സണ്‍ സ്മിത വി. നായര്‍, കുടുംബശ്രീ പ്രവര്‍ത്തകര്‍ എന്നിവര്‍ പങ്കെടുത്തു.