പാഴ്വസ്തുക്കളിൽ പതിനഞ്ചുകാരൻ തീർക്കുന്നു മിനിയേച്ചർ വാഹന‍ങ്ങൾ

കോതമംഗലം: ഒറിജിനലിനെ വെല്ലുന്ന വാഹന രൂപങ്ങളുമായി പതിനഞ്ചുകാരൻ. പാഴ്‌വസ്തുക്കൾകൊണ്ട് വാഹനങ്ങളുടെ ചെറുരൂപങ്ങൾ തീർത്ത് ശ്രദ്ധേയനാകുകയാണ് തൃക്കാരിയൂർ കരീപ്പുഴി കടവ് സ്വദേശി ജിഷ്ണു. സ്കൂളിലെ പരിപാടികൾക്കായി ഓട്ടോ ഡൈവറായ പിതാവ് അമ്മപറമ്പിൽ മനോജ് സ്പോഞ്ചിൽ ഉണ്ടാക്കി നൽകിയ മോഡലിൽനിന്ന് പ്രചോദനം ഉൾക്കൊണ്ടാണ് ഈ രംഗത്തേക്ക് കടന്നുവരുന്നത്.

വാഹനങ്ങളെ ഇഷ്​ടപ്പെടുന്ന ജിഷ്ണു വളരെ പെ​െട്ടന്ന് തന്നെ ഒർജിനലിനെ വെല്ലുന്ന മോഡൽ നിർമിച്ച് ശ്രദ്ധേയനായി. സാധാരണ വാഹനങ്ങളിലുള്ള എല്ലാ സംവിധാനവും ജിഷ്ണു ഉണ്ടാക്കുന്ന ചെറുപതിപ്പിലും ഉൾപ്പെടുത്തിയിട്ടുണ്ട്.

പുറംമോടിയിൽ മാത്രം ശ്രദ്ധിക്കാതെ വാഹനങ്ങളുടെ ഇൻറീരിയറും അതേപടി പകർത്തുന്നതിൽ അതീവ ശ്രദ്ധ കാണിച്ചിട്ടുണ്ട് ഈ കൊച്ചുകലാകാരൻ. ടൂറിസ്​റ്റ് ബസ്​, മിനി ട്രാവലർ, ലോറി, ഓട്ടോ എന്നിവയുടെ തനത് രൂപങ്ങളാണ് ഉണ്ടാക്കുന്നത്. ചിത്രരചനയിലും മിടുക്കനാണ്​.