വെള്ളരിക്കുണ്ടിൽ മൂന്നേക്കർ കൃഷി കത്തിനശിച്ചു

നീലേശ്വരം: ബളാൽ പഞ്ചായത്തിലെ വെള്ളരിക്കുണ്ട് പ്രകാശ് എസ്റ്റേറ്റിൽ ബുധനാഴ്ച ഉച്ചകഴിഞ്ഞുണ്ടായ തീപിടിത്തത്തിൽ മൂന്ന് ഏക്കറിലെ കൃഷി കത്തിനശിച്ചു. ഇതിൽ റബറും ഉൾപ്പെടുന്നു. ആളപായമില്ല. നാട്ടുകാരും പൊലീസും വെള്ളരിക്കുണ്ടിലെ വ്യാപാരികളും സമയോചിതമായി ഇടപെട്ടതിനെ തുടർന്നാണ് തീ കൂടുതൽ സ്ഥലങ്ങളിലേക്ക് പടരുന്നത് ഒഴിവായത്.

ജില്ല പഞ്ചായത്തംഗം ജോമോൻ ജോസ്, ബ്ലോക്ക് പഞ്ചായത്തംഗം ഷോബി ജോസഫ്, വാർഡംഗം കെ.ആർ. വിനു, മുൻ അംഗം ടോമി എന്നിവർ സ്ഥലത്തെത്തി.

കുറ്റിക്കോലിൽനിന്ന് ഫയർഫോഴ്സെത്തി തീ കെടുത്തുകയും മറ്റ് സ്ഥലങ്ങളിൽ തീ പടരുന്നത് തടയുകയും ചെയ്തു. സ്റ്റേഷൻ ഓഫിസർ ഷാജി ജോസഫിന്റെ നേതൃത്വത്തിൽ ഫയർമാന്മാരായ വി.വി. ദിലീപ്, വി. സുരേഷ്, പി. ദേവദത്ത്, ഡ്രൈവർ ഇ. പ്രസീദ്, ഹോം ഗാർഡുമാരായ പി.കൃഷ്ണൻ, വി.എം. റോയി എന്നിവർ പങ്കെടുത്തു.