സ്വർണ കവർച്ച: മോഷ്​ടാക്കളുടേതെന്ന് കരുതുന്ന വിരലടയാളം ലഭിച്ചു

നീലേശ്വരം: പടന്നക്കാട് കുതിരയൽ എൽ.ഐ. ഹൈദരാലിയുടെ വീട്ടിൽ ശനിയാഴ്ച പുലർച്ചയോടെ നടന്ന കവർച്ച സംബന്ധിച്ച് അന്വേഷണം ഊർജിതമാക്കി. കാസർകോട് നിന്നെത്തിയ പൊലീസ് നായും വിരലടയാള വിദഗ്ധരും കവർച്ച നടന്ന വീട്ടിൽ പരിശോധന നടത്തി. ഇവിടെനിന്ന്​ മണം പിടിച്ച് ഓടിയ നായ്​ മുന്നിലെ റോഡിൽ കൂടിയും പറമ്പിൽ കൂടിയും രണ്ടുതവണ ഓടി റോഡിലെത്തി നിന്നു. കവർച്ച നടന്ന റൂമിലെ കതകിൽനിന്നും അലമാരയിലെ പിടിയിൽനിന്നും മോഷ്​ടാക്കളുടേതെന്ന് കരുതുന്ന വിരലടയാളങ്ങൾ ലഭിച്ചു.

കവർച്ച നടന്ന വീടിന് പരിസരത്തെയും തൊട്ടടുത്ത കടകളിലെയും മറ്റും ദൃശ്യങ്ങളാണ് പരിശോധനക്കായി കസ്​റ്റഡിയിലെടുത്തത്. വീടിനെ സംബന്ധിച്ച് വ്യക്​തമായി അറിയുന്ന കള്ളനോ കള്ളന്മാരോ ആയിരിക്കുമെന്നാണ് സംശയിക്കുന്നത്. ശനിയാഴ്ച ഉച്ചയോടെയാണ് മോഷണവിവരം വീട്ടുകാർ അറിയുന്നത്. 35 പവൻ സ്വർണരണങ്ങളാണ് മോഷണം പോയത്. മുകളിലെ മുറിയിലെ അലമാരയിൽ സൂക്ഷിച്ചിരുന്ന സ്വർണമാണ് മോഷണം പോയത്. വീടിനോട് ചേർന്നുള്ള മരത്തിലൂടെയാണ് മോഷ്​ടാവ് മുകളിൽ കയറിയതെന്നാണ് സംശയിക്കുന്നത്.