മഞ്ചേശ്വരത്ത്​ എം.എൽ.എയുടെ ഫോൺ ചലഞ്ച്; ഓണറേറിയം വീതിച്ച് നൽകും

കാസർകോട്​: മഞ്ചേശ്വരം മണ്ഡലത്തിലെ അഞ്ഞൂറോളം വിദ്യാർഥികൾക്ക് ഓൺലൈൻ പഠനത്തിന്​ സൗകര്യമില്ലെന്ന റിപ്പോർട്ടുകളെ തുടർന്ന്​ മണ്ഡലത്തിൽ എ.കെ.എം. അഷ്​റഫ്​ എം.എൽ.എയുടെ നേതൃത്വത്തിൽ ഫോൺ ചലഞ്ച്​ തുടങ്ങി.

ഉപ്പള മുളിഞ്ച സ്കൂളിലെ ബി.ആർ.സിയിൽ ബ്ലോക്ക് പഞ്ചായത്ത് പ്രസിഡൻറ്​, മണ്ഡലത്തിലെ എട്ട് പഞ്ചായത്ത് പ്രസിഡൻറുമാർ, ജില്ല പഞ്ചായത്ത് മെംബർമാർ, ഡി.ഇ.ഒ ഉൾ​െപ്പടെയുള്ളവരും പ​ങ്കെടുത്ത യോഗത്തിലാണ്​ പ്രഖ്യാപനം. ഒാൺലൈൻ പഠനസൗകര്യമില്ലാത്തവരെ അതത്​ പഞ്ചായത്തുകൾ ക​ണ്ടെത്തണം. എം.എൽ.എയുടെ ഓണറേറിയം വീതിച്ച് എട്ട് പഞ്ചായത്തിലെയും ഫോൺ ചലഞ്ചിന് സഹായം നൽകും.

വൈദ്യുതിയില്ലാത്ത പത്തോളം വീടുകളിൽ കണക്​ഷൻ നൽകാനുള്ള നടപടികൾ സ്വീകരിക്കുകയും നെറ്റ്​വർക്ക് ഇല്ലാത്ത മേഖലകളിൽ അത്​ ലഭ്യമാക്കാൻ സേവനദാതാക്കളുമായി ആശയവിനിമയം നടത്താനും തീരുമാനിച്ചു. കെ.എസ്.എഫ്.ഇയുടെ ലാപ്ടോപ്പ് സ്കീം പ്രോത്സാഹിപ്പിക്കാനുള്ള നിർദേശവും നടപ്പാക്കും.

മുൻ എം.എൽ.എ എം.സി. ഖമറുദ്ദീൻ അനുവദിച്ച 149 ടെലിവിഷനുകളും പ്രവർത്തിക്കുന്നുണ്ടോ എന്ന് പരിശോധിച്ച്​ റിപ്പോർട്ട് നൽകാൻ പഞ്ചായത്ത് സെക്രട്ടറിമാർക്ക് നിർദേശം നൽകി. ടെലിവിഷൻ ലഭിച്ചിട്ടും വൈദ്യുതി കണക്​ഷൻ ലഭ്യമല്ലാത്തതിനാൽ ഉപയോഗിക്കാൻ സാധിക്കാത്ത അംഗൻവാടികളുടെ കണക്കെടുപ്പ് നടത്തി റിപ്പോർട്ട് നൽകാൻ നിർദേശം നൽകി.