മാഷ് പദ്ധതി: കുമ്പള പഞ്ചായത്തിൽ പരിശോധന ശക്​തമാക്കി

കുമ്പള: കോവിഡ് വ്യാപനം തടയുന്നതിനായി ജില്ല കലക്‌ടറുടെ നേതൃത്വത്തില്‍ രൂപവത്​കരിച്ച മാഷ് പദ്ധതിയുടെ ഭാഗമായി, കുമ്പള പഞ്ചായത്തില്‍ കോവിഡ് മാനദണ്ഡങ്ങൾ പാലിക്കുന്നുണ്ടോ എന്ന പരിശോധന ശക്​തമാക്കി. നിയമിക്കപ്പെട്ട അധ്യാപകര്‍, പഞ്ചായത്ത് അധികൃതര്‍, ആരോഗ്യ പ്രവര്‍ത്തകര്‍, പൊലീസ് അധികൃതര്‍ എന്നിവര്‍ ചേര്‍ന്ന് കുമ്പള നഗരത്തില്‍ പരിശോധനയും ബോധവത്​കരണവും നടത്തി.

പലചരക്കുകടകള്‍, മത്സ്യമാര്‍ക്കറ്റ്, ഹോട്ടലുകള്‍, മറ്റു വ്യാപാര സ്ഥാപനങ്ങള്‍ എന്നിവ സന്ദര്‍‌ശിച്ച് പരിശോധന നടത്തി. മാസ്ക് ധരിക്കല്‍, അകലം പാലിക്കല്‍, സാനിറ്റൈസര്‍, രജിസ്​റ്റര്‍ എന്നിവ സൂക്ഷിക്കല്‍ തുടങ്ങിയ കാര്യങ്ങളില്‍ ജാഗ്രത പുലര്‍ത്താനുള്ള നിർദേശങ്ങളും ലംഘനങ്ങള്‍ ആവര്‍ത്തിക്കാതിരിക്കാനുള്ള മുന്നറിയിപ്പും നല്‍കി. കോവിഡ് വ്യാപനം നിയന്ത്രണാതീതമായി വർധിക്കുന്ന സാഹചര്യത്തില്‍ പൊതുജനങ്ങള്‍ കൂടുതല്‍ ജാഗ്രത പുലര്‍ത്തണമെന്ന സന്ദേശമാണ്‌ ഈ സന്ദര്‍ശനത്തിലൂടെ നല്‍കുന്നത്. തുടര്‍ന്നുള്ള ദിവസങ്ങളില്‍ വാര്‍ഡുകള്‍ കേന്ദ്രീകരിച്ച് പരിശോധന കര്‍ശനമാക്കാനാണ്‌ തീരുമാനം.

നിയമം ലംഘിക്കുന്നവര്‍ക്കെതിരെ പിഴയും ശക്​തമായ നിയമനടപടികളും സ്വീകരിക്കുന്നതാണെന്ന് അധികൃതര്‍ അറിയിച്ചു. ആരോഗ്യ-വിദ്യാഭ്യാസ സ്​ഥിരം സമിതി ചെയര്‍മാന്‍ എ.കെ. ആരിഫ്, വികസന സമിതി ചെയര്‍മാന്‍ ബി.എന്‍. മുഹമ്മദ് അലി, മെംബർ രമേശ് ഭട്ട്, ഡോ. സുബ്ബ ഗട്ടി, എ.എസ്. ദീപേഷ്, എച്ച്. ഐ കുര്യാക്കോസ്, ജെ.എസ്. പ്രദീപ് കുമാർ, ആരോഗ്യ പ്രവര്‍ത്തകരായ വൈ. ഹരീഷ്, വിവേക്, അഖില്‍, ആദർശ്, അധ്യാപകരായ ഇസ്മായില്‍ സൂരംബയല്‍, മുഹമ്മദ് കുഞ്ഞി, അബ്​ദുല്‍ റഹ്​മാന്‍ റിയാസ്, ശിഹാബ് മൊഗ്രാൽ, കെ. ബാലകൃഷ്ണ, കെ.വി. ദിനേശ്, രാധാകൃഷ്ണ, വിശ്വനാഥ് ഭട്ട്, കെ. ലോകേഷ്, കെ. കിരൺ തുടങ്ങിയവര്‍ പങ്കെടുത്തു.