എം.ഡി.എം.എ മയക്കുമരുന്നുമായി മൂന്നു​പേർ പിടിയിൽ

കാസർകോട്​: വിപണിയിൽ ലക്ഷങ്ങൾ വിലവരുന്ന എം.ഡി.എം.എ മയക്കുമരുന്നുമായി മൂന്നംഗ സംഘം പിടിയിൽ. കാഞ്ഞങ്ങാട് ആറങ്ങാടിയിലെ സയ ഷമീർ (30), കാഞ്ഞങ്ങാട് കാരാട്ടുവയലിലെ മഞ്ചുനാഥ്(21), പാണത്തൂർ ബാപ്പങ്കയത്തെ എം.എ. ആരീഫ്(24)എന്നിവരെയാണ് വിദ്യാനഗർ ഇൻസ്​പെക്ടർ വി.വി. മനോജി​െൻറ നേതൃത്വത്തിലുള്ള പൊലീസ്​ സംഘം പിടികൂടിയത്. ഇവരിൽനിന്ന്​ 20.75 ഗ്രാം എം.ഡി.എം.എയും 29860 രൂപയും പിടികൂടി. ഇവരെത്തിയ രണ്ട് കാറും പൊലീസ്​ പിടിച്ചെടുത്തു. മുട്ടത്തോടി ഹിദായത്ത് നഗറിലെ വാടക വീട് കേന്ദ്രീകരിച്ചാണ് മയക്കു മരുന്ന് വിൽപന നടത്തിവന്നത്. രാത്രിയിൽ കാറുകളിലും ബൈക്കുകളിലുമായി നിരവധി പേർ മയക്കുമരുന്ന് തേടിയെത്തിയിരുന്നു. വിദ്യാനഗർ എസ്​.ഐ കെ. പ്രശാന്ത്, എ.എസ്​.ഐ രഘു, സിവിൽ പൊലീസ്​ ഓഫിസർമാരായ ഹരിലാൽ, സലാം, ഉണ്ണികൃഷ്ണൻ, സുധീരൻ, സുദീപ് എന്നിവരും സി.ഐക്കൊപ്പമുണ്ടായിരുന്നു.