ഡ്രൈവിങ് സ്കൂൾ ഗ്രൗണ്ടിൽ വിജിലൻസ് പരിശോധന; 2.6 ലക്ഷം പിടികൂടി

കാഞ്ഞങ്ങാട്: ഡ്രൈവിങ് സ്കൂൾ ഗ്രൗണ്ടായ ഗുരുവനത്ത് നടന്ന വിജിലൻസ്​ പരിശോധനയിൽ 2,69,860 രൂപയും അനുബന്ധ രേഖകളും പിടിച്ചെടുത്തു. ഡ്രൈവിങ് സ്കൂൾ ഏജൻറുമാരായ നൗഷാദ്, റമീസ്, എം.വി.ഐ കെ.ആർ. പ്രസാദ് എന്നിവരെ വിജിലൻസ് കസ്​റ്റഡിയിലെടുത്തു.

ബുധനാഴ്ച രാവിലെ പത്തരയോടെയാണ് ഡിവൈ.എസ്.പി കെ. വേണുഗോപാലി​‍െൻറ നേതൃത്വത്തിൽ വിജിലൻസ് സംഘമെത്തിയത്. ഡ്രൈവിങ് ഏജൻറുമാർ വ്യാപകമായി പണപ്പിരിവ് നടത്തുന്നുവെന്ന രഹസ്യവിവരത്തെ തുടർന്നായിരുന്നു ഇത്. ഡ്രൈവിങ് ടെസ്​റ്റിന് ഇരുചക്രവാഹനത്തിന് 1000 രൂപ, മറ്റു വാഹനങ്ങൾക്ക് 1500-2000 രൂപവരെ ഏജൻറുമാർ പിരിച്ചെടുത്തിരുന്നു. ടെസ്​റ്റിൽ പരാജയപ്പെടുന്നവരുടെ കൈയിൽനിന്ന് 500 രൂപ അധിക തുക വേറെയും ഈടാക്കിയിരുന്നു. ഗൾഫ്നാടുകളിലേക്ക് പോകുന്നവർ, ഇതര സംസ്ഥാനത്തുള്ളവർ എന്നിവരിൽനിന്ന് 2000 മുതൽ 5000 രൂപ വരെ ഈടാക്കിയതായി വിജിലൻസ് വൃത്തങ്ങൾ പറഞ്ഞു.

എം.വി.ഐ ഉൾ​െപ്പടെയുള്ളവർക്കെതിരെ കൂടുതൽ അന്വേഷണം നടത്തി വിജിലൻസ് ഡയറക്ടർക്ക് റിപ്പോർട്ട് കൈമാറുമെന്ന് ഡിവൈ.എസ്.പി കെ. വേണുഗോപാൽ വ്യക്തമാക്കി. ഡിവൈ.എസ്.പിയെ കൂടാതെ എസ്.ഐ രമേശൻ, സീനിയർ സിവിൽ ഓഫിസർമാരായ സതീശൻ, സുരേഷൻ, രഞ്ജിത്ത്, രാജീവൻ, കൃഷ്ണൻ സംഘത്തിലുണ്ടായിരുന്നു.