കാട്ടുപന്നിശല്യത്തിൽ പൊറുതിമുട്ടി കർഷകർ

കാഞ്ഞങ്ങാട്: കാട്ടുപന്നികളുടെ വിളയാട്ടം മൂലം പൊറുതിമുട്ടി കർഷകർ. കൃഷിയിടങ്ങളിൽ ഇവ വലിയ നാശനഷ്ടമാണ് വരുത്തുന്നത്. പുല്ലൂർ പെരിയ, കോടോം-ബേളൂർ ഗ്രാമപഞ്ചായത്തുകളിലാണ് കാട്ടുപന്നിശല്യം രൂക്ഷമായത്. മീങ്ങോത്ത്, കുമ്പള, എത്യക്കയ, കാട്ടിപ്പാറ തുടങ്ങിയ പ്രദേശങ്ങളിലെ നാട്ടുകാർ കാട്ടുപന്നിശല്യം കൊണ്ട് പൊറുതിമുട്ടി. കഴിഞ്ഞദിവസങ്ങളിൽ പ്രദേശത്തെ കൃഷികൾ വ്യാപകമായി നശിപ്പിച്ചു.

പരപ്പ, ബളാൽ ഭാഗങ്ങളിൽ നേരത്തെ കാട്ടുപന്നി ശല്യം വ്യാപകമായിരുന്നു. കോടോം-ബേളൂർ, പുല്ലൂർ-പെരിയ പഞ്ചായത്തുകളിൽ അടുത്തകാലത്താണ് ശല്യം രൂക്ഷമായത്. മാസങ്ങളോളമുള്ള അധ്വാനം ഒരു രാത്രിയിൽ നശിപ്പിക്കപ്പെടുന്നതിന്റെ ആവലാതിയിലാണ് കർഷകർ. അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.