ജീവിതം ചോദ്യചിഹ്നമായി പന്തൽ, ഡക്കറേഷൻ തൊഴിലാളികൾ

കാഞ്ഞങ്ങാട്: ലോക്​ഡൗണ്‍ പ്രഖ്യാപിച്ച മാർച്ച്​ മാസം മുതൽ കഴിഞ്ഞ ഏഴ്​ മാസമായി കടുത്ത ദുരിതത്തിലാണ് സംസ്ഥാനത്തെ പന്തൽ, അലങ്കാര, വാടക സാധനങ്ങളുമായി ഉപജീവനം നടത്തുന്നവർ. നാട്ടിൽ എന്തുപരിപാടിയുണ്ടായാലും സ്​റ്റേജ്​, പന്തൽ, ഡക്കറേഷൻ എന്നിവക്കും മൈക്ക് സെറ്റിനും​ ഇവരെ ഒഴിവാക്കാൻ കഴിയുമായിരുന്നില്ല.

വിവാഹം, മരണാന്തര ചടങ്ങുകൾ എന്നിവയും ഇവരില്ലാതെ നടക്കുമായിരുന്നില്ല. എന്നാൽ ലോക്​ഡൗൺ മുതൽ നാട്ടിൽ പരിപാടികളൊന്നും നടക്കാതായതോടെയാണ്​ ഇവരുടെ ജീവിതം താളം തെറ്റിയത്​. പട്ടിണിയിലായപ്പോൾ കൊറോണ വന്നോ​ട്ടെയെന്ന്​ പോലും ചിന്തിച്ചുപോകുന്ന​തായി തൊഴിലാളികൾ പറഞ്ഞു.

ലോക്​ഡൗണില്‍ ഇളവ് അനുവദിച്ചെങ്കിലും സ്​റ്റേജ് പരിപാടികള്‍, പൊതുസമ്മേളനങ്ങള്‍ തുടങ്ങിയവയൊന്നും നടക്കാത്തതും വിവാഹം പോലുള്ള ചടങ്ങുകള്‍ വീടുകളില്‍ ഒതുങ്ങിയതും ഈ മേഖലയെ കാര്യമായി തന്നെ ബാധിച്ചു. ഇതിനെ ആശ്രയിച്ച് കഴിഞ്ഞിരുന്ന ലക്ഷങ്ങള്‍ ജോലിയില്ലാതെ പട്ടിണിയിലാണ്.

സര്‍ക്കാരി​െൻറ കൈത്താങ്ങില്ലാതെ ഇനി ഉയരാനാവില്ലെന്നാണ്​ ഹയർ​ഗുഡ് ഓണേഴ്​സ്​ പറയുന്നത്​. പന്തല്‍, ഡെക്കറേഷന്‍, ലൈറ്റ് ആൻറ്​ സൗണ്ട്, മറ്റു വാടക സാധനങ്ങള്‍ വിതരണം ചെയ്യുന്ന സ്ഥാപനങ്ങള്‍ എന്നിവയടക്കം ചെറുതും വലുതുമായി 16,500 രജിസ്​റ്റേര്‍ഡ് ഹയര്‍ സര്‍വീസ് സ്ഥാപനങ്ങളാണ് സംസ്​ഥാനത്ത്​ പ്രവര്‍ത്തിക്കുന്നത്.

രണ്ടു ലക്ഷത്തിലേറെ തൊഴിലാളികളാണ്​ ഈ മേഖലയിൽ കേന്ദ്രീകരിച്ച്​​ ഉപജീവനം നടത്തുന്നത്​. കഴിഞ്ഞ ഏഴ്​മാസംകൊണ്ട് കോടികളുടെ നഷ്​ടമുണ്ടായി. ഓണത്തി​െൻറ ഒരു ദിവസം മാത്രമുള്ള വരുമാനം ഉടമകളുടെയും തൊഴിലാളികളുടെയും ആശ്രയമായിരുന്നു.

എന്നാൽ ഇക്കുറി പേരിനുപോലും ഓണപരിപാടികളുണ്ടായില്ല. കാസർകോട്​ ജില്ലയിൽ മാത്രം ആറായിരത്തോളം തൊഴിലാളികളുണ്ട്​. ഇതു കൂടാതെ ലക്ഷക്കണക്കിന് രൂപയുടെ സാധന സാമഗ്രികൾ ഓരോ സ്ഥാപനങ്ങളുടെയും ഗോഡൗണുകളില്‍ മാസങ്ങളായി കെട്ടിക്കിടക്കുകയാണ്​. ഉപയോഗിക്കാതെ ഇവ സൂക്ഷിച്ചുവെക്കൽ ശ്രമകരമാണ്​.

തുരു​െമ്പടുത്ത്​ നശിച്ചുപോകുകയും ചെയ്യും. 2021ൽ തിരിച്ചടവ്​ തുടങ്ങുന്ന രീതിയിൽ നാല്​ ശതമാനം പലിശയിൽ അഞ്ച്​ ലക്ഷം രൂപയെങ്കിലും വായ്​പ അനുവദിക്കുക, ആയിരത്തോളം പേർക്ക്​ ഇരിക്കാവുന്ന ഓപ്പൺ ഓഡിറ്റോറിയങ്ങളിൽ 250 പേരെയെങ്കിലും അനുവദിച്ച്​ പരിപാടികൾ അനുവദിക്കുക, പ്രത്യേക സാമ്പത്തികക പാക്കേജ്​ അനുവദിക്കുക തുടങ്ങിയ ആവശ്യങ്ങൾ ഉന്നയിച്ച്​ മുഖ്യമന്ത്രി ഉൾപ്പടെയുള്ള മന്ത്രിമാർക്കും മുഴുവൻ എം.എൽ.എമാർക്കും എം.പി മാർക്കും നിവേദനം നൽകിയതായി ഹയർ​ഗുഡ്​സ്​ ഓണേഴ്​സ്​ സംസ്ഥാന ഭാരവാഹികളായ ടി.വി. ബാലൻ കാസർകോട്​, കെ.പി. അഹമ്മദ്​ കോയ കോഴിക്കോട്​ എന്നിവർ അറിയിച്ചു.