പാഠഭാഗത്തെ കഥാപാത്രങ്ങളെ കളിമണ്ണിലൊരുക്കി രണ്ടാം ക്ലാസുകാരി

ചെറുവത്തൂർ: രണ്ടാം ക്ലാസുകാരിയുടെ കരവിരുതിൽ പുനർജനിക്കുന്നത് പാഠഭാഗങ്ങളിലെ കഥാപാത്രങ്ങൾ. ചെറിയാക്കര ഗവ. എൽ.പി സ്കൂളിലെ ഋഷിക വിനോദാണ് കോവിഡ് കാല പഠനം സർഗാത്​മകതകൊണ്ട് വ്യത്യസ്തമാക്കുന്നത്. പഠനത്തിൽ മിടുക്കിയായ ഋഷിക ഓരോ പാഠഭാഗങ്ങളിലെയും വ്യത്യസ്തങ്ങളായ കഥാപാത്രങ്ങൾക്ക് കളിമണ്ണിലാണ് പുനർജനി ഒരുക്കുന്നത്.

ഒരോ ദിവസവും മൂന്ന് കഥാപാത്രങ്ങളെയെങ്കിലും നിർമിക്കും. ഒന്നാം ക്ലാസിൽ പഠിക്കുമ്പോൾ തന്നെ ഉപജില്ല മേളയിൽ അടക്കം വിദ്യാലയത്തെ പ്രതിനിധാനംചെയ്​തുകൊണ്ട് പങ്കെടുക്കാനും ഈ മിടുക്കിക്ക് സാധിച്ചിട്ടുണ്ട്.

കളിമണ്ണിൽ മുതല, ആമ, പാമ്പ്,അടുക്കള ഉപകരണങ്ങൾ എന്നുവേണ്ട ഏതു രൂപങ്ങളും നിമിഷനേരം കൊണ്ട് കുഞ്ഞിക്കൈകളാൽ ഋഷിക നിർമിക്കും. പിതാവ്​ ഒ.കെ വിനോദ് മകൾക്കുവേണ്ടി കളിമൺ ബ്ലോക്കുകൾ എത്തിച്ചുനൽകും.

കളിമണ്ണിൽ തീർക്കുന്ന രൂപങ്ങൾ ത​െൻറ അധ്യാപകർക്കും കൂട്ടുകാർക്കും അവരുടെ വിശേഷ ദിനങ്ങളിൽ നൽകാൻ ഋഷിക പ്രത്യേകം ശ്രദ്ധിക്കാറുമുണ്ട്. ശിൽപകലയിൽ എന്ന പോലെ ചിത്രകലയിലും കഴിവുതെളിയിക്കാൻ ഋഷികക്ക് കഴിഞ്ഞിട്ടുണ്ട്.