ആര്യശ്രീയുടെ വീടൊരുങ്ങി; താക്കോല്‍ദാനം ഇന്ന്

കാസർകോട്​: അന്തര്‍ദേശീയ വനിത ഫുട്ബാള്‍ താരം ആര്യശ്രീയുടെയും കുടുംബത്തി​‍ൻെറയും വീടെന്ന സ്വപ്നം പൂവണിയുന്നു. കായിക യുവജനകാര്യ വകുപ്പ് നിർമിച്ച് നല്‍കുന്ന വീടി​‍ൻെറ താക്കോല്‍ ദാനം ശനിയാഴ്​ച ഉച്ച ഒരുമണിക്ക് വ്യവസായ മന്ത്രി ഇ.പി. ജയരാജന്‍ ഓണ്‍ലൈനായി നിര്‍വഹിക്കും. ഭൂട്ടാനില്‍ നടന്ന സാഫ് ഗെയിംസില്‍ ചാമ്പ്യന്മാരായ ഇന്ത്യന്‍ ടീമി​‍ൻെറ പ്രധിരോധ നിരയില്‍ നെടുംതൂണായിരുന്ന ആര്യശ്രീക്ക്​ വീടു നിർമിച്ച് നല്‍കുന്നതിനായി 10 ലക്ഷം രൂപയാണ് മന്ത്രി അനുവദിച്ചത്. തെക്കന്‍ ബങ്കളം രാങ്കണ്ടത്ത് നടക്കുന്ന താക്കോല്‍ ദാന ചടങ്ങില്‍ തൃക്കരിപ്പൂര്‍ എം.എല്‍.എ എം. രാജഗോപാലന്‍ അധ്യക്ഷത വഹിക്കും. ജില്ല പഞ്ചായത്ത്​ പ്രസിഡൻറ്​ ബേബി ബാലകൃഷ്ണന്‍, ജില്ല കലക്ടര്‍ ഡോ. ഡി. സജിത്ബാബു എന്നിവര്‍ മുഖ്യാതിഥികളാകും. ജില്ല സ്‌പോര്‍ട്‌സ് കാണ്‍സിലിനായിരുന്നു നിർമാണ ചുമതല.