ദേശീയപാത വികസനം: കടകൾ നഷ്​ടപ്പെടുന്ന ആശങ്കയിൽ വ്യാപാരികൾ

നീലേശ്വരം: ദേശീയപാത വികസനത്തി​‍ൻെറ ഭാഗമായി കടകൾ നഷ്​ടപ്പെടുന്ന വ്യാപാരികൾ ആശങ്കയിൽ. നീലേശ്വരം മാർക്കറ്റിൽ മാത്രം നൂറോളം കടയുടമകൾക്കാണ് ഒഴിഞ്ഞുപോകേണ്ടി വരുക. എന്നാൽ, അർഹമായ നഷ്​ടപരിഹാരം പോലും ലഭിക്കാതെ ഇനിയെന്ത് എന്ന ചോദ്യത്തിന് മുന്നിൽ പകച്ചുനിൽക്കുകയാണ് വ്യാപാരികൾ. മാർക്കറ്റ് ജങ്​ഷനിൽ കോട്ടപ്പുറം റോഡ് മുതൽ കരുവാച്ചേരി വരെ മാത്രം നൂറോളം കടകൾ ഒഴിയേണ്ടി വരും. ഇവിടെ നിലവിൽ കെട്ടിടങ്ങൾപൊളിച്ചു തുടങ്ങിയിട്ടുണ്ട്. കാൽനൂറ്റാണ്ടിലധികമായി കച്ചവടം നടത്തിവന്നവരാണ് ഭൂരിഭാഗം വ്യാപാരികളും. എന്നാൽ, ഒഴിഞ്ഞുപോകേണ്ട ഇവർക്ക് അർഹമായ നഷ്​ടപരിഹാരം കെട്ടിട ഉടമകൾ നൽകാത്തതിനാൽ വാടക റൂമിലെ കച്ചവടക്കാർ എന്ത് ചെയ്യണമെന്നറിയാതെ പകച്ചുനിൽക്കുകയാണ്​. മറ്റൊരു സ്ഥലത്ത് പുതിയ മുറിയെടുത്ത് വീണ്ടും കച്ചവടം ചെയ്യാൻ വൻതുക വേണ്ടി വരും. പല വ്യാപാരികളും ഇപ്പോഴും ഒഴിഞ്ഞുകൊടുക്കാൻ തയാറായിട്ടില്ല. കടയൊഴിഞ്ഞാൽ പലർക്കും ഈ മേഖലയിൽതന്നെ തുടരാൻ സാധിക്കുമോ എന്ന ആശങ്കയും നിലനിൽക്കുന്നു. അതേസമയം, കെട്ടിടങ്ങൾ പൊളിച്ചുനീക്കുന്ന നടപടി ഒരുവശത്തു നടന്നുവരുകയാണ്.