മരത്തിന്‍റെ ശിഖരം റോഡിലേക്ക് ഒടിഞ്ഞു വീണു; വാഹനങ്ങൾ തകർന്നു

കണ്ണൂർ: തെക്കീബസാർ ശിക്ഷക് സദന് സമീപം രജിസ്ട്രാർ ഓഫീസ് വളപ്പിലെ കൂറ്റൻ ആൽമരത്തിന്‍റെ പാതി ഭാഗം പൊട്ടിവീണ് ഗതാഗത തടസ്സമുണ്ടായി. റോഡരികിൽ നിർത്തിയിട്ടിരുന്ന കാറുകൾക്കും ബൈക്കുകൾക്കും മുകളിലാണ് ആൽമര ശിഖരങ്ങൾ പൊട്ടിവീണത്.

സമീപത്ത് നിർത്തിയിട്ടിരുന്ന മൂന്ന് കാറുകൾക്കും രണ്ട് ബൈക്കുകൾക്കും കേടുപാടുകൾ സംഭവിച്ചു. രണ്ട് കാറുകൾ ഭാഗികമായി തകർന്നു. കണ്ണൂർ അഗ്നിരക്ഷാ സേനയിലെ അസി. സ്റ്റേഷൻ ഓഫിസർ സുകുമാരന്റെ നേതൃത്വത്തിൽ മരം മുറിച്ചുനീക്കി ഗതാഗതം പുന:സ്ഥാപിച്ചു.