പട്ടാപ്പകൽ പിടിച്ചുപറി; മൂവർ സംഘം പിടിയിൽ

കണ്ണൂർ: നഗരത്തിൽ പട്ടാപ്പകൽ പിടിച്ചുപറി നടത്തിയ മൂവർ സംഘത്തെ ടൗൺ പൊലീസ് പിടികൂടി. കഴിഞ്ഞ ദിവസം വൈകീട്ട് അഞ്ചിനാണ് സംഭവം. കണ്ണൂർ പാറക്കണ്ടി റെയിൽവേ ട്രാക്കിനടുത്ത് നിൽക്കുകയായിരുന്ന യുവാവിനെ തടഞ്ഞുനിർത്തി കഴുത്തിനുപിടിച്ച് ട്രൗസറിന്റെ പോക്കറ്റിൽനിന്നും 11,000 രൂപയും മൊബൈൽ ഫോണും കവരുകയായിരുന്നു.

തുടർന്ന് കണ്ണൂർ ടൗൺ പൊലീസ് കേസെടുത്ത് അന്വേഷണം ആരംഭിച്ചു.കൊറ്റാളി ചിറക്കൽ പള്ളി കൊയ്യപ്പുറം നഹാസ് മൻസിലിൽ കെ. മുജീബ് (33), കൊറ്റാളി അത്താഴക്കുന്ന് കാക്കിരിച്ചാൽ പുതിയപുരയിൽ കെ.പി. നസീർ (41), കാടാച്ചിറ ഉമൈബ മൻസിലിൽ എം.സി. ബഷീർ (27) എന്നിവരെയാണ് കണ്ണൂർ ടൗൺ ഇൻസ്‌പെക്ടർ ശ്രീജിത്ത് കൊടേരി, എസ്‌.ഐ അരുൺ, എ.എസ്‌.ഐമാരായ എം.അജയൻ, രഞ്ജിത്, നാസർ, ലതീഷ് എന്നിവരുടെ നേതൃത്വത്തിലുള്ള സംഘം പിടികൂടിയത്.