മരിച്ച വയോധികന്റെ സ്വർണമോതിരം ആശുപത്രി ജീവനക്കാരൻ മോഷ്ടിച്ചെന്ന് പരാതി

തലശ്ശേരി: നഗരത്തിലെ സ്വകാര്യ ആശുപത്രിയിൽ ചികിത്സയിലിരിക്കെ മരിച്ചയാളുടെ സ്വർണമോതിരം ആശുപത്രി ജീവനക്കാരൻ മോഷ്ടിച്ചതായി പരാതി. ടെംപ്ൾ ഗേറ്റിന് സമീപത്ത് താമസിക്കുന്ന യുവതിയുടെ പരാതിയിൽ തലശ്ശേരി ടൗൺ പൊലീസ് കേസെടുത്ത് അന്വേഷണമാരംഭിച്ചു. കഴിഞ്ഞ മാസമാണ് പരാതിക്കാധാരമായ സംഭവം.

ചികിത്സയിലിരിക്കെ യുവതിയുടെ പിതാവ് മരിച്ചു. മൃതദേഹം സംസ്കാര ചടങ്ങുകൾക്ക് കൊണ്ടുപോകുന്നതിനുമുമ്പ് കൈവിരലിലെ ഒരു പവന്റെ സ്വർണമോതിരം കാണാതായെന്നാണ് പരാതി.

ഡ്യൂട്ടിയിലുണ്ടായിരുന്ന ആശുപത്രി ജീവനക്കാരൻ ഇതെടുത്തുവെന്നാണ് പരാതിയിൽ പറയുന്നത്. അന്നത്തെ സി.സി.ടി.വി കാമറ ദൃശ്യങ്ങൾ പരിശോധിച്ചുവരുകയാണെന്ന് പൊലീസ് അറിയിച്ചു.