ആർ.എസ്.എസ് നേതാവിന്‍റെ വീട്ടിൽ ബോംബ് സ്ഫോടനം

പെരിങ്ങോം: കാങ്കോൽ ആലക്കാട് ആർ.എസ്.എസ് നേതാവിന്‍റെ വീട്ടിൽ ബോംബ് സ്​ഫോടനം. ബോംബ്​ നിർമാണത്തിനിടയിലാണ്​ സ്​ഫോടനമെന്നാണ്​ സൂചന. സംഭവത്തെത്തുടർന്ന്​ പൊലീസ്​ സ്ഥലത്തെത്തി പ്രാഥമികാന്വേഷണം നടത്തി. ഞായറാഴ്​ച ഫോറൻസിക്​ വിദഗ്​ധർ സ്ഥലത്തെത്തി പരിശോധന നടത്തുമെന്ന്​ പെരിങ്ങോം പൊലീസ്​ അറിയിച്ചു.

തെളിവുകളൊക്കെ നശിപ്പിച്ചതായാണ്​ വിവരം. പരിക്കേറ്റ നേതാവിനെ സംഭവസ്ഥലത്തുനിന്ന്​ അജ്​ഞാത കേന്ദ്രത്തിലേക്ക്​ ചികിത്സക്കായി മാറ്റിയതായും വിവരമുണ്ട്​. സംഭവത്തിൽ പൊലീസ് കർശന നടപടി സ്വീകരിക്കണമെന്ന്​ സി.പി.എം പെരിങ്ങോം ഏരിയ കമ്മിറ്റി ആവശ്യപ്പെട്ടു. കൊലപാതകമടക്കം നിരവധി ക്രിമിനൽ കേസുകളിൽ പ്രതിയായ നേതാവിന്റെ വീട്ടിലാണ് സ്ഫോടനം നടന്നതെന്നും പരിക്കേറ്റതിനെ തുടർന്ന്​ പുറമെനിന്ന്​ എത്തിയ വാഹനത്തിൽ രഹസ്യകേന്ദ്രത്തിലേക്ക് മാറ്റിയതായും സി.പി.എം പറഞ്ഞു.

നാടിന്റെ സമാധാനം തകർക്കാനും അക്രമം നടത്താനും ആർ.എസ്.എസ് കോപ്പുകൂട്ടുകയാണെന്നും പ്രസ്താവനയിൽ പറഞ്ഞു.