lead package കോവിഡ്​ വാക്​സിൻ: ​ജില്ലയിൽ രണ്ടു​ ദിവസത്തേക്കുള്ള സ്​റ്റോക്ക്​ മാത്രം

കണ്ണൂർ: കോവിഡ്​ വാക്​​സിൻ ക്ഷാമത്തിലേക്ക്​ കണ്ണൂരും. ജില്ലയിൽ രണ്ട്​ ദിവസത്തേക്കുള്ള കോവിഡ്​ പ്രതിരോധ കുത്തിവെപ്പ്​ മാത്രമാണ്​ ആരോഗ്യവകുപ്പി​ൻെറ കൈവശമുള്ളത്​​. വ്യാഴാഴ്​ച രാവിലെ 37,000 ഡോസ്​ സ്​റ്റോക്കുണ്ടായിരുന്നു. ഉച്ചയോടെ 11,500 ഡോസ്​ കോഴിക്കോട്​ നിന്നെത്തി. ജില്ലയിലെ ആശുപത്രികളിലും മെഗാ ക്യാമ്പുകളിലും ഒരു ദിവസം ശരാശരി 10,000 മുതൽ 15,000 വരെ ഡോസാണ്​ ആവശ്യമുള്ളത്​. രണ്ടുദിവസത്തിനിടെ വാക്​സിൻ എത്തിയില്ലെങ്കിൽ വിതരണം ബുദ്ധിമുട്ടിലാവും. കോഴിക്കോട്​ റീജനൽ വാക്​സിൻ സ്​റ്റോറിൽനിന്നാണ്​ വാക്​സിൻ എത്തുന്നത്​. കോവാക്​സിനും കോവിഷീൽഡുമാണ്​ ആരോഗ്യവകുപ്പി​ൻെറ കൈവശമുള്ളത്​. സ്ഥിരമായി സജ്ജീകരിച്ച മെഗാ ക്യാമ്പുകളിലും ആശുപത്രികളിലും പ്രതിരോധ കുത്തിവെപ്പ്​ തുടരുന്നുണ്ട്​. പ്രാദേശിക തലത്തിൽ സംഘടിപ്പിക്കാനിരുന്ന മെഗാ ക്യാമ്പുകൾ ഈ മാസം 18ന്​ ശേഷം നടത്താൻ നിർദേശം നൽകിയിട്ടുണ്ട്​. ആവശ്യത്തിന്​ വാക്​സിൻ എത്തിയില്ലെങ്കിൽ ജില്ലയിലെ കോവിഡ്​ പ്രതിരോധ പ്രവർത്തനങ്ങളെ ബാധിക്കും. മെഗാ വാക്‌സിനേഷന്‍ ക്യാമ്പുകളില്‍ 500-1000 പേര്‍ക്കുള്ള സൗകര്യമാണുള്ളത്​​. 45 വയസ്സിന്​ മുകളിലുള്ളവര്‍, ആരോഗ്യപ്രവര്‍ത്തകര്‍, കോവിഡ് മുന്നണിപ്പോരാളികള്‍, പോളിങ്​ ഉദ്യോഗസ്ഥര്‍ എന്നിവര്‍ക്കാണ് ഇവിടെ വാക്‌സിന്‍ നല്‍കുന്നത്. ജില്ലയിലെ തെരഞ്ഞെടുക്കപ്പെട്ട സ്വകാര്യ ആശുപത്രികളിലും വാക്​സിനേഷൻ നടക്കുന്നുണ്ട്​.