പ്ലസ്​വൺ സീറ്റ്​: ഫ്രറ്റേണിറ്റി പ്രവർത്തകർ റോഡ് ഉപരോധിച്ചു; നേതാക്കളെ അറസ്​റ്റ്​ ചെയ്​ത്​ നീക്കി

കണ്ണൂർ: പ്ലസ്​വൺ സീറ്റിലെ കുറവ്​ പരിഹരിക്കണമെന്നാവശ്യപ്പെട്ട്​ ​ഫ്രറ്റേണിറ്റി മൂവ്​മെന്‍റ്​ നടത്തിയ റോഡ് ഉപരോധ സമരത്തിൽ നേതാക്കളെ പൊലീസ് ബലം പ്രയോഗിച്ച്​​ അറസ്​റ്റ്​ ചെയ്​ത്​ നീക്കി. കണ്ണൂർ കാൽടെക്​സ്​ ജംങ്​ഷനിലാണ്​ ഉപരോധ സമരം സംഘടിപ്പിച്ചത്​. മലബാറിനോടുള്ള വിദ്യാഭ്യാസ അവഗണന അവസാനിപ്പിക്കുക, മുഴുവൻ വിദ്യാർഥികൾക്കും സീറ്റ് ഉറപ്പ് വരുത്തുക തുടങ്ങിയ ആവശ്യങ്ങൾ ഉന്നയിച്ചാണ് പ്രതി​ഷേധം സംഘടിപ്പിച്ചത്.

സമരത്തിനിടെ പൊലീസെത്തി നേതാക്കളെ റോഡിൽ നിന്ന്​ അറസ്​റ്റ്​ ചെയ്​ത്​ നീക്കുകയായിരുന്നു. പ്ലസ് വൺ സീറ്റ് രണ്ടാം അലോട്ട്മെൻറ്​ കഴിഞ്ഞിട്ടും ജില്ലയിൽ 12,000ത്തോളം വിദ്യാർഥികൾ പുറത്താണെന്ന്​ നേതാക്കൾ ആരോപിച്ചു. പ്രക്ഷോഭത്തിന്​ നേതൃത്വം നൽകിയ ജില്ലാ പ്രസിഡൻറ്​ ലുബൈബ് ബഷീർ, ജില്ല സമിതി അംഗങ്ങാളായ ഷബീർ എടക്കാട്, നിദാൽ സിറാജ്, മണ്ഡലം കമ്മിറ്റി അംഗങ്ങളായ തജ്‌സിർ എടക്കാട്, ഫർഹാൻ ഉളിയിൽ എന്നിവരെയാണ്​ പൊലീസ് അറസ്റ്റ് ചെയ്ത്​ നീക്കിയത്​.

കള്ളക്കണക്കുകളും വാഗ്ദാനങ്ങളും മാത്രം ജനങ്ങളുടെ മുന്നിൽ നിരത്തുന്ന സർക്കാറിനെതിരെ തെരുവുകൾ സ്തംഭിപ്പിച്ച്​ നീതി ലഭ്യമാക്കും വരെ പ്രക്ഷോഭ സമരങ്ങളുമായി പോവുമെന്ന് ജില്ല പ്രസിഡന്‍റ് ലുബൈബ് ബഷീർ അറിയിച്ചു.