ബാബു അച്ചാരത്ത് സ്മാരക ട്രോഫി ക്രിക്കറ്റ്: ബി.കെ 55 ക്ലബിന് ഒമ്പത് വിക്കറ്റ് ജയം

തലശ്ശേരി: കോണോർവയൽ ക്രിക്കറ്റ് സ്റ്റേഡിയത്തിൽ നടക്കുന്ന ബാബു അച്ചാരത്ത് മെമ്മോറിയൽ ട്രോഫി ജില്ല എ ഡിവിഷൻ ലീഗ് ക്രിക്കറ്റ് ചാമ്പ്യൻഷിപ്പിൽ രഞ്ജി താരം അക്ഷയ് ചന്ദ്രന്റെ ഓൾറൗണ്ട് പ്രകടന മികവിൽ തലശ്ശേരി ബി.കെ 55 ക്രിക്കറ്റ് ക്ലബ് ഒമ്പത് വിക്കറ്റിന് ധർമടം ക്രിക്കറ്റ് ക്ലബിനെ പരാജയപ്പെടുത്തി. 12 റൺസിന് മൂന്ന് വിക്കറ്റും പുറത്താകാതെ 27 റൺസുമെടുത്ത് അക്ഷയ് ചന്ദ്രൻ മാൻ ഓഫ് ദി മാച്ചായി. ടോസ് നേടി ആദ്യം ബാറ്റ് ചെയ്ത ധർമടം ക്രിക്കറ്റ് ക്ലബ് 28.5 ഓവറിൽ 97 റൺസിന് ഓൾ ഔട്ടായി. നിഖിൽ പുറത്താകാതെ 19 റൺസും നിജിൽ 19 റൺസുമെടുത്തു. ബി.കെ 55നുവേണ്ടി അക്ഷയ് ചന്ദ്രൻ മൂന്ന് വിക്കറ്റും എസ്. സൗരവ്, അഭിരാജ്, ശ്രിദിൻ എന്നിവർ രണ്ട് വിക്കറ്റ് വീതവും വീഴ്ത്തി. മറുപടിയായി ബി.കെ 55 ക്രിക്കറ്റ് ക്ലബ് 13.3 ഓവറിൽ ഒരുവിക്കറ്റ് നഷ്ടത്തിൽ വിജയലക്ഷ്യം നേടി. ഒമർ അബൂബക്കർ പുറത്താകാതെ 55 റൺസും അക്ഷയ് ചന്ദ്രൻ പുറത്താകാതെ 27 റൺസുമെടുത്തു. ശനിയാഴ്ചത്തെ മത്സരത്തിൽ, നിലവിൽ റണ്ണറപ്പായ ധർമടം സീഗൾസ് ക്രിക്കറ്റ് ക്ലബ് തലശ്ശേരി അബ്ബ ക്രിക്കറ്റ് ക്ലബിനെ നേരിടും.