തൊഴിലുറപ്പിൽ 100 ദിനം പൂർത്തീകരിച്ച സ്ത്രീകൾക്ക് ഓണസമ്മാനം

മാഹി: തൊഴിലുറപ്പ് പദ്ധതിയിൽ 100 തൊഴിൽദിനങ്ങൾ പൂർത്തീകരിച്ച അഴിയൂർ ഗ്രാമപഞ്ചായത്തിലെ 100 തൊഴിലാളികൾക്ക് ഓണസമ്മാനമായി 1000 രൂപ വീതം വിതരണം ചെയ്​തു. മുഴുവനും സ്ത്രീ തൊഴിലാളികളാണ്. ഇതിനുമുമ്പ് 27 തൊഴിലാളികൾക്കായിരുന്നു ആനുകൂല്യം ലഭിച്ചതെങ്കിൽ ഈ വർഷം അത് നൂറുപേർക്ക് നൽകാൻ സാധിച്ചത് നേട്ടമായി. തൊഴിലാളികളിൽ 74 വയസ്സ്​ പൂർത്തിയായ ഏഴാം വാർഡ് പനാടയിലെ സി.എം. നാണിയുടെ വീട്ടിലെത്തി പഞ്ചായത്ത് പ്രസിഡൻറ് വി.പി. ജയൻ തുക കൈമാറി. മറ്റുള്ളവർക്ക് തൊട്ടടുത്ത പ്രവൃത്തിദിവസം ബാങ്കിലൂടെ തുക ലഭിക്കും. വൈസ് പ്രസിഡൻറ് ഷീബ അനിൽ, പഞ്ചായത്ത് സെക്രട്ടറി ടി. ഷാഹുൽ ഹമീദ്, വാർഡ് മെംബർ വഫ ഫൈസൽ, തൊഴിലുറപ്പ് ഓവർസിയർ കെ. രഞ്ജിത്ത് കുമാർ, വി.കെ. സുധ എന്നിവർ സംബന്ധിച്ചു.