സംരക്ഷണ കവചമൊരുക്കി

പാനൂർ: നവോത്ഥാനാചാര്യൻ വാഗ്ഭടാനന്ദൻ ജീവിച്ചിരിക്കെ നിർമിക്കപ്പെട്ട വാഗ്ഭടാനന്ദ ഗുരുദേവ വിലാസം വായനശാല ആൻഡ് ഗ്രന്ഥാലയ മന്ദിരം പൈതൃക സ്വത്തായി കണക്കാക്കി സംരക്ഷിക്കണമെന്ന് ആവശ്യം ശക്തമായി. നിർദിഷ്ട കുറ്റ്യാടി -മട്ടന്നൂർ വിമാനത്താവളത്തിന്റെ റോഡ് വികസന സർവേയിൽ നിന്ന് മന്ദിരത്തെ ഒഴിവാക്കി സംരക്ഷിക്കണമെന്നാണ് ആവശ്യം. നടൻ ശ്രീനിവാസനടക്കമുള്ളവരുടെ നാടകരംഗ പ്രവേശനത്തിന് നാന്ദി കുറിച്ച സ്ഥാപനം കൂടിയാണിത്. ഈ ആവശ്യം ഉന്നയിച്ച് വായനശാല ബാലവേദി പ്രവർത്തകർ ഒരുക്കിയ സംരക്ഷണ കവചത്തിന്റെ ഉദ്ഘാടനം ബാലസാഹിത്യകാരൻ പ്രേമാനന്ദ് ചമ്പാട് നിർവഹിച്ചു. ടി. ഭാസ്കരൻ അധ്യക്ഷത വഹിച്ചു. ശശീന്ദ്രൻ പാട്യം, ടി.സി. സുധാകരൻ, സി.വി. സുധാകരൻ, വി.പി. ഷാജി എന്നിവർ സംസാരിച്ചു.