പിക്​അപ്​ വാൻ കടയിലേക്ക് ഇരച്ചുകയറി

കൂത്തുപറമ്പ്: മമ്പറത്ത് റേഷൻ കടയും വെൽഡിങ് ഷോപ്പും പ്രവർത്തിക്കുന്ന കെട്ടിടത്തിലേക്ക് പിക്​അപ്​ വാൻ പാഞ്ഞുകയറി വൻ നാശനഷ്ടം. ആളുകൾ ഓടി മാറിയതിനാൽ വൻ ദുരന്തമാണ് ഒഴിവായത്. ചൊവ്വാഴ്ച രാവിലെ 10ഓടെ മമ്പറം -തലശ്ശേരി റോഡിലാണ് അപകടം. മലപ്പുറത്തുനിന്നും ചക്കരക്കല്ലിലേക്ക് പോവുകയായിരുന്ന പിക്​അപ്​ വാൻ റേഷൻ കടയും വെൽഡിങ്​ ഷോപ്പും പ്രവർത്തിക്കുന്ന കെട്ടിടത്തിലേക്ക് പാഞ്ഞു കയറുകയായിരുന്നു. കാറിനിടിച്ച ശേഷമാണ് നിയന്ത്രണം വിട്ട പിക്​അപ്​ വാൻ കടയിലേക്ക് പാഞ്ഞുകയറിയത്. കടക്ക് സമീപം നിർത്തിയിട്ടിരുന്ന ബൈക്കും പൂർണമായും തകർന്നിട്ടുണ്ട്. വിഷു അടുത്തതിനാൽ നിരവധി ആളുകളാണ് ഈ സമയം റേഷൻ കടയിൽ ഉണ്ടായിരുന്നത്. ആളുകൾ ഓടിമാറിയതിനാലാണ് വൻ ദുരന്തം ഒഴിവായത്. കെട്ടിടത്തിന്റെ ഷീറ്റുകളും മറ്റും അപകടത്തിൽ തകർന്നിട്ടുണ്ട്. വൻ നഷ്ടമാണ് സംഭവിച്ചതെന്ന് കടയുടമ പറഞ്ഞു. പിണറായി പൊലീസ് സ്ഥലത്തെത്തി അന്വേഷണം നടത്തി. അപകടത്തിനിടയാക്കിയ വാഹനം പിന്നീട് നീക്കം ചെയ്തു.