വെങ്ങരയിൽ യുവാവ് കൊല്ലപ്പെട്ട സംഭവം; പിതാവ് റിമാൻഡിൽ

പഴയങ്ങാടി: കുടുംബവഴക്കിനെ തുടർന്നുണ്ടായ സംഘർഷത്തിൽ വെങ്ങരയിലെ വിപിൻകുമാർ(32) കൊല്ലപ്പെട്ട സംഭവത്തിൽ അറസ്റ്റിലായ പിതാവ് വെങ്ങര ഇ.എം.എസ് മന്ദിരത്തിനു സമീപത്തെ കെ.വി. അരവിന്ദാക്ഷ​നെ(70) കോടതി റിമാൻഡ് ചെയ്തു. പഴയങ്ങാടി ഇൻസ്പെക്ടർ രാജഗോപാലും സംഘവും കഴിഞ്ഞദിവസമാണ് ഇദ്ദേഹത്തെ അറസ്റ്റ് ചെയ്തത്. ഈ മാസം അഞ്ചിന് രാത്രിയാണ് കുടുംബവഴക്കിനിടെ അടിയേറ്റ് വിപിൻകുമാർ പരിയാരം ഗവ. മെഡിക്കൽ കോളജിൽ ആശുപത്രിയിൽ മരിച്ചത്. സംഭവത്തിൽ സഹോദരൻ വിനോദ് കുമാറിനെ(36) നേരത്തേ പൊലീസ് അറസ്റ്റ് ചെയ്തിരുന്നു. റിമാൻഡിലായിരുന്ന പ്രതിയെ കസ്റ്റഡിയിൽ വാങ്ങി നടത്തിയ തെളിവെടുപ്പിനെ തുടർന്നാണ് പിതാവായ കെ.വി. അരവിന്ദാക്ഷൻ അറസ്റ്റിലായത്. പയ്യന്നൂർ കോടതിയാണ് ഇയാളെ റിമാൻഡ് ചെയ്തത്.